falak ne pis kar surma banaya

falak ne piis kar surma banāyā

nazar meñ us kī maiñ to bhī na aaya

zamāne meñ mire shor-e-junūñ ne

qayāmat kā sā hangāma uThāyā

balā thī koft kuchh soz-e-jigar se

hameñ to kūT-kūT un ne jalāyā

tamāmī umr jis kī justujū kī

use paas apne ik dam bhī na paayā

na thī begānagī mā'lūm us kī

na samjhe ham usī se dil lagāyā

qarīb-e-dair ḳhizr aaya thā lekin

hameñ rasta na ka.abe kā batāyā

haq-e-sohbat na tairoñ ko rahā yaad

koī do phuul asīroñ tak na laayā

ġhurūr-e-husn us kā das gunā hai

hamārā ishq use kin ne jatāyā

ajab naqsha hai naqqāsh-e-azal ne

koī aisā na chehra phir banāyā

ilāqa 'mīr' thā ḳhanjar se us ke

nidān apnā galā ham ne kaTāyā

falak ne pis kar surma banaya

nazar mein us ki main to bhi na aaya

zamane mein mere shor-e-junun ne

qayamat ka sa hangama uThaya

bala thi koft kuchh soz-e-jigar se

hamein to kuT-kuT un ne jalaya

tamami umr jis ki justuju ki

use pas apne ek dam bhi na paya

na thi beganagi ma'lum us ki

na samjhe hum usi se dil lagaya

qarib-e-dair KHizr aaya tha lekin

hamein rasta na kabe ka bataya

haq-e-sohbat na tairon ko raha yaad

koi do phul asiron tak na laya

ghurur-e-husn us ka das guna hai

hamara ishq use kin ne jataya

ajab naqsha hai naqqash-e-azal ne

koi aisa na chehra phir banaya

ilaqa 'mir' tha KHanjar se us ke

nidan apna gala hum ne kaTaya