faro aata nahin sar naz se ab ke amiron ka

faro aatā nahīñ sar naaz se ab ke amīroñ kā

agarche āsmāñ tak shor jaave ham faqīroñ kā

tabassum sehr hai jab paan se lab surḳh hoñ us ke

diloñ meñ kaam kar jaatā hai yaañ jaadū ke tīroñ kā

saraknā us ke darbāñ paas se hai shab ko bhī mushkil

sar-e-zanjīr zer-e-sar rakhe hai ham asīroñ kā

ga.e bahutoñ ke sar laḌkoñ ne jo ye bāñdhnūñ bāñdhe

shahīd ik maiñ nahīñ in bāñdhnūñ ke surḳh chīroñ kā

qafas ke chaak se dekhūñ huuñ maiñ to tang aatā huuñ

chaman meñ ġhuncha ho aanā guloñ par ham-safīroñ kā

hamāre dekhte zer-e-nagīñ thā mulk sab jin ke

koī ab naam bhī letā nahīñ un mulk-gīroñ kā

dil-e-pur ko to un palkoñ hī ne sab chhān maarā thā

kiyā 'mīr' un ne ḳhālī yūñhī tarkash apne tīroñ kā

faro aata nahin sar naz se ab ke amiron ka

agarche aasman tak shor jawe hum faqiron ka

tabassum sehr hai jab pan se lab surKH hon us ke

dilon mein kaam kar jata hai yan jadu ke tiron ka

sarakna us ke darban pas se hai shab ko bhi mushkil

sar-e-zanjir zer-e-sar rakhe hai hum asiron ka

gae bahuton ke sar laDkon ne jo ye bandhnun bandhe

shahid ek main nahin in bandhnun ke surKH chiron ka

qafas ke chaak se dekhun hun main to tang aata hun

chaman mein ghuncha ho aana gulon par ham-safiron ka

hamare dekhte zer-e-nagin tha mulk sab jin ke

koi ab nam bhi leta nahin un mulk-giron ka

dil-e-pur ko to un palkon hi ne sab chhan mara tha

kiya 'mir' un ne KHali yunhi tarkash apne tiron ka