ghaflat mein gai aah meri sari jawani

ġhaflat meñ ga.ī aah mirī saarī javānī

ai 'umr-e-guzashta maiñ tirī qadr na jaanī

thī ābla-e-dil se hameñ tishnagī meñ chashm

phūTā to na aaya nazar ik buuñd bhī paanī

muddat se haiñ ik musht-e-par āvāra chaman meñ

niklī hai ye kis kī havas-e-bāl-fishānī

bhātī hai mujhe ik talab-e-bosa meñ ye aan

luknat se ulajh jā ke use baat na aanī

qaaf

kyā jāniye kyā kyā maiñ likhūñ shauq meñ qāsid

paḌhnā na kare ḳhat kā kahīñ us pe girānī

taklīf na kar naame ke likhne kī tū mujh ko

aa jaa.e jo kuchh jī meñ tire kahiyo zabānī

ye jaan agar bed-e-muvalla kahīñ dekhe

baaqī hai kisū mū-e-pareshāñ kī nishānī

dekheñ to sahī kab ta.iiñ nibhtī hai ye sohbat

ham jī se tire dost haiñ tū dushman-e-jānī

majnūñ bhī na rusvā-e-jahāñ hotā na vo aap

maktab meñ jo kam aatī pa lailā thī divānī

qaaf

ik shaḳhs mujhī sā thā ki vo tujh pe thā āshiq

vo us kī vafā-peshgī vo us kī javānī

ye kah ke jo royā to lagā kahne na kah 'mīr'

suntā nahīñ maiñ zulm-rasīdoñ kī kahānī

ghaflat mein gai aah meri sari jawani

ai 'umr-e-guzashta main teri qadr na jaani

thi aabla-e-dil se hamein tishnagi mein chashm

phuTa to na aaya nazar ek bund bhi pani

muddat se hain ek musht-e-par aawara chaman mein

nikli hai ye kis ki hawas-e-baal-fishani

bhati hai mujhe ek talab-e-bosa mein ye aan

luknat se ulajh ja ke use baat na aani

qaf

kya jaaniye kya kya main likhun shauq mein qasid

paDhna na kare KHat ka kahin us pe girani

taklif na kar name ke likhne ki tu mujh ko

aa jae jo kuchh ji mein tere kahiyo zabani

ye jaan agar bed-e-muwalla kahin dekhe

baqi hai kisu mu-e-pareshan ki nishani

dekhen to sahi kab tain nibhti hai ye sohbat

hum ji se tere dost hain tu dushman-e-jaani

majnun bhi na ruswa-e-jahan hota na wo aap

maktab mein jo kam aati pa laila thi diwani

qaf

ek shaKHs mujhi sa tha ki wo tujh pe tha aashiq

wo us ki wafa-peshgi wo us ki jawani

ye kah ke jo roya to laga kahne na kah 'mir'

sunta nahin main zulm-rasidon ki kahani