gala mat toD apna ai jaras bas

galā mat toḌ apnā ai jaras bas

nahīñ is raah meñ fariyād-ras bas

kabhū dil kī na kahne paa.e us se

jahāñ bole lagā kahne ki bas bas

gul-o-gulzār se kyā qaidiyoñ ko

hameñ dāġh-e-dil-o-kunj-e-qafas bas

na tarsāo yakāyak maar Daalo

karoge kab talak ham par taras bas

bahut kam dete the bādal dikhā.ī

rahe ham hī to rote is baras bas

kisū mahbūb kī ho gor par gul

hamārī ḳhaak ko hai ḳhār-o-ḳhas bas

chaman ke ġham meñ siina daaġh hai 'mīr'

bahut niklī hamārī bhī havas bas

gala mat toD apna ai jaras bas

nahin is rah mein fariyaad-ras bas

kabhu dil ki na kahne pae us se

jahan bole laga kahne ki bas bas

gul-o-gulzar se kya qaidiyon ko

hamein dagh-e-dil-o-kunj-e-qafas bas

na tarsao yakayak mar Dalo

karoge kab talak hum par taras bas

bahut kam dete the baadal dikhai

rahe hum hi to rote is baras bas

kisu mahbub ki ho gor par gul

hamari KHak ko hai KHar-o-KHas bas

chaman ke gham mein sina dagh hai 'mir'

bahut nikli hamari bhi hawas bas