gham abhi kya mahshar-e-mashhur ka

ġham abhī kyā mahshar-e-mash.hūr kā

shor sā hai to va-lekin duur kā

haq to sab kuchh hī hai tū nāhaq na bol

baat kahte sar kaTā mansūr kā

biich se kab kā gayā ab zikr kyā

us dil-e-marhūm kā maġhfūr kā

turfa ātish-ḳhez sangistāñ hai dil

muqtabas yaañ se hai sho'la tuur kā

qaaf

mar ga.e par ḳhaak hai sab kibr-o-nāz

mat jhuko sar go kisū maġhrūr kā

Thīkrī ko qadr hai us ko nahīñ

TuuTe jab kaasa sar-e-faġhfūr kā

qaaf

ho khaḌā vo to parī sī hai khaḌī

muñh khule to jaise chehra huur kā

dekh use kyūñkar malak bhīchak na hoñ

aañkh ke aage ye buq'a nuur kā

chashm bahne se kabhū rahtī nahīñ

kuchh ‘ilāj ai 'mīr' is nāsūr kā

gham abhi kya mahshar-e-mashhur ka

shor sa hai to wa-lekin dur ka

haq to sab kuchh hi hai tu nahaq na bol

baat kahte sar kaTa mansur ka

bich se kab ka gaya ab zikr kya

us dil-e-marhum ka maghfur ka

turfa aatish-KHez sangistan hai dil

muqtabas yan se hai sho'la tur ka

qaf

mar gae par KHak hai sab kibr-o-naz

mat jhuko sar go kisu maghrur ka

Thikri ko qadr hai us ko nahin

TuTe jab kasa sar-e-faghfur ka

qaf

ho khaDa wo to pari si hai khaDi

munh khule to jaise chehra hur ka

dekh use kyunkar malak bhichak na hon

aankh ke aage ye buq'a nur ka

chashm bahne se kabhu rahti nahin

kuchh ‘ilaj ai 'mir' is nasur ka