guzar-e-abr ab bhi jab kabhu idhar ko hota hai

guzār-e-abr ab bhī jab kabhū īdhar ko hotā hai

hamārī bekasī par zār-bārāñ der rotā hai

huā mazkūr naam us kā ki aañsū bah chale muñh par

hamāre kaam saare dīda-e-tar hī Dubotā hai

bajā hai sīna-kūbī sang se dil ḳhuun hote haiñ

jo hamdam aise jaate haiñ to mātam saḳht hotā hai

na kī nashv-o-numā kāmil na kaam apnā kiyā hāsil

falak koī bhī dil se tuḳhm ko be-vaqt botā hai

hilānā abrūoñ kā le hai zer-e-teġh āshiq ko

palak kā mārnā barchhī kaleje meñ chubhotā hai

kahāñ ai rashk-e-āb-e-zindagī hai tū ki yaañ tujh bin

har ik pākīza gauhar jī se apne haath dhotā hai

lagā murde ko mere dekh kar vo nā-samajh kahne

javānī kī hai niiñd is ko ki is ġhaflat se sotā hai

pareshāñ gard sā gaahe jo mil jaatā hai sahrā meñ

usī kī justujū meñ ḳhizr bhī auqāt khotā hai

na rakkho kaan nazm-e-shā'irān-e-hāl par itne

chalo Tuk 'mīr' ko sunñe ki motī se pirotā hai

guzar-e-abr ab bhi jab kabhu idhar ko hota hai

hamari bekasi par zar-baran der rota hai

hua mazkur nam us ka ki aansu bah chale munh par

hamare kaam sare dida-e-tar hi Dubota hai

baja hai sina-kubi sang se dil KHun hote hain

jo hamdam aise jate hain to matam saKHt hota hai

na ki nashw-o-numa kaamil na kaam apna kiya hasil

falak koi bhi dil se tuKHm ko be-waqt bota hai

hilana abruon ka le hai zer-e-tegh aashiq ko

palak ka marna barchhi kaleje mein chubhota hai

kahan ai rashk-e-ab-e-zindagi hai tu ki yan tujh bin

har ek pakiza gauhar ji se apne hath dhota hai

laga murde ko mere dekh kar wo na-samajh kahne

jawani ki hai nind is ko ki is ghaflat se sota hai

pareshan gard sa gahe jo mil jata hai sahra mein

usi ki justuju mein KHizr bhi auqat khota hai

na rakkho kan nazm-e-sha'iran-e-haal par itne

chalo Tuk 'mir' ko sunne ki moti se pirota hai