hai meri har ek ghazal par ijtima

hai mirī har ik ġhazal par ijtimā'

ḳhānqah meñ karte haiñ suufī samā'

vajd meñ rakhtā hai ahl-e-fahm ko

mere she'r-o-shā'irī kā istimā'

nīm-bismil chhoḌ denā rahm kar

us shikār-afgan kā haigā iḳhtirā’

kuchh zarar 'aa.ed huā merī hī or

varna us se sab ko pahuñchā intifā'

yaar dushman ho gayā is ke sabab

hai matā’-e-dostī bhī kyā matā'

dil jigar ḳhuuñ ho ke ruḳhsat ho ga.e

hasrat-ālūda hai kyā ashk-e-vidā'

'mīr' dard-e-dil na kah zālim bas ab

ho gayā hai sāme'oñ ko to sudā'

hai meri har ek ghazal par ijtima'

KHanqah mein karte hain sufi sama'

wajd mein rakhta hai ahl-e-fahm ko

mere she'r-o-sha'iri ka istima'

nim-bismil chhoD dena rahm kar

us shikar-afgan ka haiga iKHtira’

kuchh zarar 'aed hua meri hi or

warna us se sab ko pahuncha intifa'

yar dushman ho gaya is ke sabab

hai mata’-e-dosti bhi kya mata'

dil jigar KHun ho ke ruKHsat ho gae

hasrat-aluda hai kya ashk-e-wida'

'mir' dard-e-dil na kah zalim bas ab

ho gaya hai same'on ko to suda'