hai tah-e-dil buton ka kya malum

hai tah-e-dil butoñ kā kyā ma.alūm

nikle parde se kyā ḳhudā ma.alūm

yahī jaanā ki kuchh na jaanā haa.e

so bhī ik umr meñ huā ma.alūm

ilm sab ko hai ye ki sab tū hai

phir hai allāh kaisā nā-ma.alūm

garche tū hī hai sab jagah lekin

ham ko terī nahīñ hai jā ma.alūm

ishq jaanā thā maar rakkhegā

ibtidā meñ thī intihā ma.alūm

un siyah-chashm dilbaroñ se hameñ

thī vafā chashm so vafā ma.alūm

tarz kiine kī koī chhuptī hai

mudda.ī kā hai mudda.ā ma.alūm

ishq hai ai tabīb jī kā rog

lutf kar hai jo kuchh davā ma.alūm

dil bajā ho to 'mīr' kuchh khāve

kuḌhne pachne meñ ishtihā ma.alūm

hai tah-e-dil buton ka kya malum

nikle parde se kya KHuda malum

yahi jaana ki kuchh na jaana hae

so bhi ek umr mein hua malum

ilm sab ko hai ye ki sab tu hai

phir hai allah kaisa na-malum

garche tu hi hai sab jagah lekin

hum ko teri nahin hai ja malum

ishq jaana tha mar rakkhega

ibtida mein thi intiha malum

un siyah-chashm dilbaron se hamein

thi wafa chashm so wafa malum

tarz kine ki koi chhupti hai

muddai ka hai muddaa malum

ishq hai ai tabib ji ka rog

lutf kar hai jo kuchh dawa malum

dil baja ho to 'mir' kuchh khawe

kuDhne pachne mein ishtiha malum