hai tamanna-e-visal uski meri jaan ke sath

hai tamannā-e-visāl us kī mirī jaan ke saath

jaan hī jā.egī āḳhir ko is armān ke saath

kyā faqat toḌ ke chhātī hī gayā tiir us kā

le gayā saaf mire dil ko bhī paikān ke saath

dīn-o-dil hī ke rahā mere vo kāfir darpe

ḳhasmī-e-qātiba us ko hai musalmān ke saath

bahr par nahr pe barse hai barābar hī abr

pesh har ik se karīm aate haiñ ehsān ke saath

satr-e-zulf aa.ī hai us rū-e-muḳhattat pe nazar

ye 'ibārat na.ī lāhaq huī qur.ān ke saath

tiir us kā jo guzar dil se chalā jī bhī chalā

rasm-e-tā’zīm se ho lete haiñ mehmān ke saath

maiñ to laḌkā nahīñ jo baale batāo mujh ko

ye farebindagī kariye kisū nādān ke saath

ḳhūn-e-muslim ko to vājib ye butāñ jaane haiñ

hoje kāfir ki amaañ yaañ nahīñ īmān ke saath

ādamiyyat se tumheñ 'mīr' ho kyūñkar bahra

tum ne sohbat nahīñ rakkhī kisū insān ke saath

hai tamanna-e-visal us ki meri jaan ke sath

jaan hi jaegi aaKHir ko is arman ke sath

kya faqat toD ke chhati hi gaya tir us ka

le gaya saf mere dil ko bhi paikan ke sath

din-o-dil hi ke raha mere wo kafir darpe

KHasmi-e-qatiba us ko hai musalman ke sath

bahr par nahr pe barse hai barabar hi abr

pesh har ek se karim aate hain ehsan ke sath

satr-e-zulf aai hai us ru-e-muKHattat pe nazar

ye 'ibarat nai lahaq hui quran ke sath

tir us ka jo guzar dil se chala ji bhi chala

rasm-e-ta’zim se ho lete hain mehman ke sath

main to laDka nahin jo baale batao mujh ko

ye farebindagi kariye kisu nadan ke sath

KHun-e-muslim ko to wajib ye butan jaane hain

hoje kafir ki aman yan nahin iman ke sath

aadamiyyat se tumhein 'mir' ho kyunkar bahra

tum ne sohbat nahin rakkhi kisu insan ke sath