humse use nifaq hua hai wifaq mein

ham se use nifāq huā hai vifāq meñ

kam ittifāq paḌte haiñ ye ittifāq meñ

shāyad ki jān-o-tan kī judā.ī bhī hai qarīb

jī ko hai iztirāb bahut ab firāq meñ

aazim pahuñchne ke the dil-o-arsh tak vale

aaya qusūr apne hī kuchh ishtiyāq meñ

ihrāq apne qalb kā rone se kab gayā

paanī kī chaar būñdeñ haiñ kyā ehtirāq meñ

tahsīl-e-ilm karne se dekhā na kuchh husūl

maiñ ne kitābeñ rakkhīñ uThā ghar ke taaq meñ

dam naak meñ ba-qaul-e-zanāñ āshiqoñ ke haiñ

hilnā balā hai motī kā us ke bulāq meñ

ik nuur garm-e-jalva falak par hai har sahar

koī to māh-pāra hai 'mīr' us rivāq meñ

hum se use nifaq hua hai wifaq mein

kam ittifaq paDte hain ye ittifaq mein

shayad ki jaan-o-tan ki judai bhi hai qarib

ji ko hai iztirab bahut ab firaq mein

aazim pahunchne ke the dil-o-arsh tak wale

aaya qusur apne hi kuchh ishtiyaq mein

ihraq apne qalb ka rone se kab gaya

pani ki chaar bunden hain kya ehtiraq mein

tahsil-e-ilm karne se dekha na kuchh husul

main ne kitaben rakkhin uTha ghar ke taq mein

dam nak mein ba-qaul-e-zanan aashiqon ke hain

hilna bala hai moti ka us ke bulaq mein

ek nur garm-e-jalwa falak par hai har sahar

koi to mah-para hai 'mir' us riwaq mein