har subh sham to pae-iza-e-mir ho

har sub.h shaam to pa.e-īzā-e-'mīr' ho

aisā na ho ki kaam hī us kā aḳhīr ho

ho koī bādshāh koī yaañ vazīr ho

apnī balā se baiTh rahe jab faqīr ho

jannat kī mannat un ke dimāġhoñ se kab uThe

ḳhāk-e-rah us kī jin ke kafan kā abiir ho

kyā yuuñ hī āb-o-tāb se ho baiTheñ kār-e-ishq

sūkhe jigar kā ḳhuuñ to ravāñ jū-e-shīr ho

chhātī qafas meñ daaġh se ho kyoñ na rashk-e-bāġh

josh-e-bahār thā ki ham aa.e asiir ho

yaañ barg-e-gul uḌāte haiñ parkāla-e-jigar

jā andalīb tū na mirī ham-safīr ho

us ke ḳhayāl ḳhat meñ kise yaañ dimāġh-e-harf

kartī hai be-maza jo qalam kī sarīr ho

zinhār apnī aañkh meñ aatā nahīñ vo said

phūTā dosār jis ke jigar meñ na tiir ho

hote haiñ mai-kade ke javāñ shaiḳh jī bure

phir darguzar ye karte nahīñ go ki piir ho

kis tarah aah ḳhāk-e-mazallat se maiñ uThūñ

uftāda-tar jo mujh se mirā dastgīr ho

had se ziyāda jaur-o-sitam ḳhushnumā nahīñ

aisā sulūk kar ki tadāruk-pazīr ho

dam bhar na Thahre dil meñ na āñkhoñ meñ ek pal

itne se qad pe tum bhī qayāmat sharīr ho

aisā hī us ke ghar ko bhī ābād dekhiyo

jis ḳhānumāñ-ḳharāb kā ye dil mushīr ho

taskīn-e-dil ke vāste har kam-baġhal ke paas

insāf kariye kab ta.iiñ muḳhlis haqīr ho

yak vaqt-e-ḳhās haq meñ mire kuchh duā karo

tum bhī to 'mīr' sāhib-o-qibla faqīr ho

har subh sham to pae-iza-e-'mir' ho

aisa na ho ki kaam hi us ka aKHir ho

ho koi baadshah koi yan wazir ho

apni bala se baiTh rahe jab faqir ho

jannat ki mannat un ke dimaghon se kab uThe

KHak-e-rah us ki jin ke kafan ka abir ho

kya yun hi aab-o-tab se ho baiThen kar-e-ishq

sukhe jigar ka KHun to rawan ju-e-shir ho

chhati qafas mein dagh se ho kyon na rashk-e-bagh

josh-e-bahaar tha ki hum aae asir ho

yan barg-e-gul uDate hain parkala-e-jigar

ja andalib tu na meri ham-safir ho

us ke KHayal KHat mein kise yan dimagh-e-harf

karti hai be-maza jo qalam ki sarir ho

zinhaar apni aankh mein aata nahin wo said

phuTa dosar jis ke jigar mein na tir ho

hote hain mai-kade ke jawan shaiKH ji bure

phir darguzar ye karte nahin go ki pir ho

kis tarah aah KHak-e-mazallat se main uThun

uftada-tar jo mujh se mera dastgir ho

had se ziyaada jaur-o-sitam KHushnuma nahin

aisa suluk kar ki tadaruk-pazir ho

dam bhar na Thahre dil mein na aankhon mein ek pal

itne se qad pe tum bhi qayamat sharir ho

aisa hi us ke ghar ko bhi aabaad dekhiyo

jis KHanuman-KHarab ka ye dil mushir ho

taskin-e-dil ke waste har kam-baghal ke pas

insaf kariye kab tain muKHlis haqir ho

yak waqt-e-KHas haq mein mere kuchh dua karo

tum bhi to 'mir' sahib-o-qibla faqir ho