hota nahin hai bab ijabat ka wa hanuz

hotā nahīñ hai baab ijābat kā vā hanūz

bismil paḌī hai charḳh pe merī duā hanūz

baaqī nahīñ hai dil meñ ye ġham hai bajā hanūz

Tapke hai ḳhuun dam-ba-dam āñkhoñ se tā-hanūz

din raat ko khiñchā hai qayāmat kā aur maiñ

phirtā huuñ muñh pe ḳhaak male jā-ba-jā hanūz

ḳhat kaaḌh lā ke tum to muñDā bhī chale vale

hotī nahīñ hamārī tumhārī safā hanūz

ġhunche chaman chaman khile is bāġh-e-dahr meñ

dil hī mirā hai jo nahīñ hotā hai vā hanūz

guzrī na paar arsh ki taskīn ho mujhe

afsos merī aah rahī nā-rasā hanūz

ahvāl nāma-bar se mirā sun ke kah uThā

jiitā hai vo sitam-zada mahjūr kyā hanūz

ġhuncha na buujh dil hai kisī mujh se zaar kā

khultā nahīñ jo sa.ī se terī sabā hanūz

toḌā thā kis kā shīsha-e-dil tū ne sang-dil

hai dil-ḳharāsh kūche meñ tere sadā hanūz

chullū meñ us ke merā lahū thā so pī chukā

uḌtā nahīñ hai tā.ir-e-rang-e-hinā hanūz

be-bāl-o-par asiir huuñ kunj-e-qafas meñ 'mīr'

jaatī nahīñ hai sar se chaman kī havā hanūz

hota nahin hai bab ijabat ka wa hanuz

bismil paDi hai charKH pe meri dua hanuz

baqi nahin hai dil mein ye gham hai baja hanuz

Tapke hai KHun dam-ba-dam aankhon se ta-hanuz

din raat ko khincha hai qayamat ka aur main

phirta hun munh pe KHak male ja-ba-ja hanuz

KHat kaDh la ke tum to munDa bhi chale wale

hoti nahin hamari tumhaari safa hanuz

ghunche chaman chaman khile is bagh-e-dahr mein

dil hi mera hai jo nahin hota hai wa hanuz

guzri na par arsh ki taskin ho mujhe

afsos meri aah rahi na-rasa hanuz

ahwal nama-bar se mera sun ke kah uTha

jita hai wo sitam-zada mahjur kya hanuz

ghuncha na bujh dil hai kisi mujh se zar ka

khulta nahin jo sai se teri saba hanuz

toDa tha kis ka shisha-e-dil tu ne sang-dil

hai dil-KHarash kuche mein tere sada hanuz

chullu mein us ke mera lahu tha so pi chuka

uDta nahin hai tair-e-rang-e-hina hanuz

be-baal-o-par asir hun kunj-e-qafas mein 'mir'

jati nahin hai sar se chaman ki hawa hanuz