hoti nahin tasalli-e-dil gulsitan se bhi

hotī nahīñ tasallī-e-dil gulsitāñ se bhī

taskīñ nahīñ hai jaan ko āb-e-ravāñ se bhī

tā ye girafta vā ho kahāñ le ke jā.iye

aa.e haiñ us kī ġhunchagī meñ tang jaañ se bhī

aage thī shoḳhī ham se kināyoñ meñ chup the ham

mushkil hai ab burā lage kahne zabāñ se bhī

har-chand dast-bai.a-e-javānāñ huuñ maiñ vale

ik e'tiqād rakhtā huuñ pīr-e-muġhāñ se bhī

jhuñjhlāhaT aur ġhusse meñ hijrān-e-yār ke

jhagḌā hameñ rahe hai zamīñ āsmāñ se bhī

qaaf

duniyā se darguzar ki guzargah ajab hai ye

darpesh ya.anī 'mīr' hai jaanā jahāñ se bhī

lashkar meñ hai mabīt isī baat ke liye

kahte haiñ log kuuch hai kal sub.h yaañ se bhī

hoti nahin tasalli-e-dil gulsitan se bhi

taskin nahin hai jaan ko aab-e-rawan se bhi

ta ye girafta wa ho kahan le ke jaiye

aae hain us ki ghunchagi mein tang jaan se bhi

aage thi shoKHi hum se kinayon mein chup the hum

mushkil hai ab bura lage kahne zaban se bhi

har-chand dast-baia-e-jawanan hun main wale

ek e'tiqad rakhta hun pir-e-mughan se bhi

jhunjhlahaT aur ghusse mein hijran-e-yar ke

jhagDa hamein rahe hai zamin aasman se bhi

qaf

duniya se darguzar ki guzargah ajab hai ye

darpesh yani 'mir' hai jaana jahan se bhi

lashkar mein hai mabit isi baat ke liye

kahte hain log kuch hai kal subh yan se bhi