hun nishan kyon na tir-e-KHuban ka

huuñ nishāñ kyoñ na tīr-e-ḳhūbāñ kā

mujh pe tuuda huā hai tūfāñ kā

haath zanjīr ho junūñ meñ rahā

apne zanjīra-e-garebāñ kā

chupke dekho jhamakte ve lab surḳh

zikr yaañ kyā hai la.al-o-marjāñ kā

ek rahzan hai us kī kāfir zulf

ġham hī rahtā hai dīn-o-īmāñ kā

umr āvārgī meñ sab guzrī

kuchh Thikānā nahīñ dil-o-jāñ kā

kāfiristāñ hai ḳhāl-o-ḳhatt-o-zulf

vaqr kyā hai dil-e-musalmāñ kā

mar gayā 'mīr'-e-nāla-kash bekas

nai ne mātam meñ us ke muñh Dhāñkā

hun nishan kyon na tir-e-KHuban ka

mujh pe tuda hua hai tufan ka

hath zanjir ho junun mein raha

apne zanjira-e-gareban ka

chupke dekho jhamakte we lab surKH

zikr yan kya hai lal-o-marjaan ka

ek rahzan hai us ki kafir zulf

gham hi rahta hai din-o-iman ka

umr aawargi mein sab guzri

kuchh Thikana nahin dil-o-jaan ka

kafiristan hai KHal-o-KHatt-o-zulf

waqr kya hai dil-e-musalman ka

mar gaya 'mir'-e-nala-kash bekas

nai ne matam mein us ke munh Dhanka