ek shor ho raha hai KHun-rezi mein hamare

ik shor ho rahā hai ḳhūñ-rezī meñ hamāre

hairat se ham to chup haiñ kuchh tum bhī bolo pyāre

zaḳhm us ke haath ke jo siine pe haiñ numāyāñ

chhātī lage raheñge zer-e-zamīñ bhī saare

haiñ bad-mizāj ḳhūbāñ par kis qadar haiñ dilkash

paa.e kahāñ guloñ ne ye mukhḌe pyāre pyāre

baiTheñ haiñ rone ko to dariyā hī ro uTheñ haiñ

josh-o-ḳharosh ye the tab ham lage kināre

laate nahīñ ho mutlaq sar tum faro ḳhudā se

ye naaz ḳhūb-rūyāñ bande haiñ ham tumhāre

koī to māh-pāra us bhī rivāq meñ hai

chashmak-zanī meñ shab ko yūñhī nahīñ haiñ taare

lag kar gale na so.e us muñh pe muñh na rakkhā

jī se ga.e ham āḳhir in hasratoñ ke maare

betābi hai dinoñ ko be-ḳhvābī hai shaboñ ko

ārām-o-sabr donoñ muddat huī sidhāre

āfāq meñ jo hote ahl-e-karam to sunte

ham barsoñ ra.ad-āsā betāb ho pukāre

jal-bujhiye ab to behtar mānind-e-barq-e-ḳhātif

juuñ abr kis ke aage dāman koī pasāre

ham ne to āshiqī meñ khoyā hai jaan ko bhī

sadqe haiñ 'mīr' jī ke ve DhūñDte haiñ vaare

ek shor ho raha hai KHun-rezi mein hamare

hairat se hum to chup hain kuchh tum bhi bolo pyare

zaKHm us ke hath ke jo sine pe hain numayan

chhati lage rahenge zer-e-zamin bhi sare

hain bad-mizaj KHuban par kis qadar hain dilkash

pae kahan gulon ne ye mukhDe pyare pyare

baiThen hain rone ko to dariya hi ro uThen hain

josh-o-KHarosh ye the tab hum lage kinare

late nahin ho mutlaq sar tum faro KHuda se

ye naz KHub-ruyan bande hain hum tumhaare

koi to mah-para us bhi riwaq mein hai

chashmak-zani mein shab ko yunhi nahin hain tare

lag kar gale na soe us munh pe munh na rakkha

ji se gae hum aaKHir in hasraton ke mare

betabi hai dinon ko be-KHwabi hai shabon ko

aaram-o-sabr donon muddat hui sidhaare

aafaq mein jo hote ahl-e-karam to sunte

hum barson rad-asa betab ho pukare

jal-bujhiye ab to behtar manind-e-barq-e-KHatif

jun abr kis ke aage daman koi pasare

hum ne to aashiqi mein khoya hai jaan ko bhi

sadqe hain 'mir' ji ke we DhunDte hain ware