ilahi kahan munh chhupaya hai tu ne

ilāhī kahāñ muñh chhupāyā hai tū ne

hameñ kho diyā hai tirī justujū ne

jo ḳhvāhish na hotī to kāhish na hotī

hameñ jī se maarā tirī aarzū ne

na bhā.īñ tujhe merī bāteñ vagarna

rakhī dhuum shahroñ meñ is guftugū ne

raqīboñ se sar joḌ baiTho ho kyūñkar

hameñ to nahīñ dete Tuk paañv chhūne

phir us saal se phuul sūñghā na maiñ ne

divāna kiyā thā mujhe terī bū ne

mudāvā na karnā thā mushfiq hamārā

jarāhat jigar ke lage dukhne duune

kuḌhāyā kisū ko khapāyā kisū ko

burā.ī hī kī sab se us ḳhūb-rū ne

vo kisrā ki hai shor jis kā jahāñ meñ

paḌe haiñge us ke mahal aaj suune

tirī chaal TeḌhī tirī baat rūkhī

tujhe 'mīr' samjhā hai yaañ kam kisū ne

ilahi kahan munh chhupaya hai tu ne

hamein kho diya hai teri justuju ne

jo KHwahish na hoti to kahish na hoti

hamein ji se mara teri aarzu ne

na bhain tujhe meri baaten wagarna

rakhi dhum shahron mein is guftugu ne

raqibon se sar joD baiTho ho kyunkar

hamein to nahin dete Tuk panw chhune

phir us sal se phul sungha na main ne

diwana kiya tha mujhe teri bu ne

mudawa na karna tha mushfiq hamara

jarahat jigar ke lage dukhne dune

kuDhaya kisu ko khapaya kisu ko

burai hi ki sab se us KHub-ru ne

wo kisra ki hai shor jis ka jahan mein

paDe hainge us ke mahal aaj sune

teri chaal TeDhi teri baat rukhi

tujhe 'mir' samjha hai yan kam kisu ne