inayat-e-azali se jo dil mila mujhko

'ināyat-e-azalī se jo dil milā mujh ko

mahall-e-shukr hai aatā nahīñ gila mujh ko

tunuk-sharāb za'īf-ud-dimāġh huuñ saaqī

dam-e-sahar mai-e-pur-zor mat pilā mujh ko

paḌā rahe koī murda sā kab talak ḳhāmosh

hilā kahīñ lab-e-jāñ-baḳhsh ko jilā mujh ko

junūñ meñ saḳht hai us zulf se 'ilāqa-e-dil

ḳhush aa gayā hai nihāyat ye silsila mujh ko

falak kī charḳh-zanī barsoñ ho to mujh sā ho

samajh samajh ke tanik ḳhaak meñ milā mujh ko

rahā thā ḳhuuñ ta.iiñ ham-rah so aaphī ḳhuun hai haif

rafīq tujh sā milegā kahāñ dilā mujh ko

durustī jeb kī itnī nahīñ hai ai nāseh

bane to sīna-e-sad-chāk de silā mujh ko

huā huuñ ḳhaak pa dil kī vahī hai nā-sāfī

abhī is aa.ine kī karnī hai jilā mujh ko

magar ki murdan-e-dushvār-e-'mīr' sahl hai shoḳh

halāk kartā hai terā musāhala mujh ko

'inayat-e-azali se jo dil mila mujh ko

mahall-e-shukr hai aata nahin gila mujh ko

tunuk-sharab za'if-ud-dimagh hun saqi

dam-e-sahar mai-e-pur-zor mat pila mujh ko

paDa rahe koi murda sa kab talak KHamosh

hila kahin lab-e-jaan-baKHsh ko jila mujh ko

junun mein saKHt hai us zulf se 'ilaqa-e-dil

KHush aa gaya hai nihayat ye silsila mujh ko

falak ki charKH-zani barson ho to mujh sa ho

samajh samajh ke tanik KHak mein mila mujh ko

raha tha KHun tain ham-rah so aaphi KHun hai haif

rafiq tujh sa milega kahan dila mujh ko

durusti jeb ki itni nahin hai ai naseh

bane to sina-e-sad-chaak de sila mujh ko

hua hun KHak pa dil ki wahi hai na-safi

abhi is aaine ki karni hai jila mujh ko

magar ki murdan-e-dushwar-e-'mir' sahl hai shoKH

halak karta hai tera musahala mujh ko