is bagh-e-be-sabaat mein kya dil saba lage

is bāġh-e-be-sabāt meñ kyā dil sabā lage

kyā kyā nihāl dekhte yaañ paañv aa lage

hirs-o-havas se baaz rahe dil to ḳhuub hai

hai qahr is kalī ke ta.iiñ gar havā lage

talḳh ab to apne jī ko bhī lagtī hai is namat

jaise kisū ke zaḳhm pe tiir ik do aa lage

kis ko ḳhabar hai kashtī-tabāhoñ ke haal kī

taḳhta magar kināre koī bah ke jā lage

aise lage phire haiñ bahut saa.e kī ravish

jaane de aisī hūr-parī se balā lage

vo bhī chaman-faroz to bulbul hai sāmne

gul aise muñh ke aage bhalā kyā bhalā lage

pis jaa.eñ yaar aañkh tirī surmagīñ paḌe

dil ḳhuuñ ho tere paañv meñ bhar kar hinā lage

bin haDDiyoñ hamārī humā kuchh na khā.egā

Tuk chāshnī-e-ishq kā us ko maza lage

ḳhat mat rakho ki is meñ bahut haiñ qabāhateñ

rakhiye tumhāre muñh pe to tum ko burā lage

maqsūd ke ḳhayāl meñ bohtoñ ne chhānī ḳhaak

'ālam tamām vahm hai yaañ haath kyā lage

sab chāhte haiñ der rahe 'mīr'-e-dil-zada

yā-rab kisū to dost kī us ko du'ā lage

is bagh-e-be-sabaat mein kya dil saba lage

kya kya nihaal dekhte yan panw aa lage

hirs-o-hawas se baz rahe dil to KHub hai

hai qahr is kali ke tain gar hawa lage

talKH ab to apne ji ko bhi lagti hai is namat

jaise kisu ke zaKHm pe tir ek do aa lage

kis ko KHabar hai kashti-tabahon ke haal ki

taKHta magar kinare koi bah ke ja lage

aise lage phire hain bahut sae ki rawish

jaane de aisi hur-pari se bala lage

wo bhi chaman-faroz to bulbul hai samne

gul aise munh ke aage bhala kya bhala lage

pis jaen yar aankh teri surmagin paDe

dil KHun ho tere panw mein bhar kar hina lage

bin haDDiyon hamari huma kuchh na khaega

Tuk chashni-e-ishq ka us ko maza lage

KHat mat rakho ki is mein bahut hain qabahaten

rakhiye tumhaare munh pe to tum ko bura lage

maqsud ke KHayal mein bohton ne chhani KHak

'alam tamam wahm hai yan hath kya lage

sab chahte hain der rahe 'mir'-e-dil-zada

ya-rab kisu to dost ki us ko du'a lage