ishq chhupa kar pachhtae hum sukh gae ranjur hue

ishq chhupā kar pachhtā.e ham suukh ga.e ranjūr hue

ya.anī aañsū pī pī ga.e so zaḳhm-e-jigar nāsūr hue

ham jo ga.e sarmast-e-mohabbat us aubāsh ke kūche meñ

khā.īñ khaḌī talvāreñ us kī zaḳhmī nashe meñ chuur hue

koī na ham ko jaane thā ham aise the gumnām aage

yumn-e-ishq se rusvā ho kar shahroñ meñ mash.hūr hue

kyā bātil nāchīz ye lauñDe qadr par apnī nāzāñ haiñ

qudrat-e-haq ke khel to dekho āshiq be-maqdūr hue

sar āshiq kā kaaT ke un ko sar-ba-garebāñ rahnā thā

so to pagḌī pher rakhī hai aur bhī ve maġhrūr hue

zard-o-zabūn-o-zār hue haiñ lutf hai kyā is jiine kā

murde se bhī barsoñ ke ham hijrāñ meñ be-nūr hue

paas hī rahnā aksar us ke 'mīr' sabab thā jiine kā

pahuñch ga.e marne ke nazdīk us se jo Tuk duur hue

ishq chhupa kar pachhtae hum sukh gae ranjur hue

yani aansu pi pi gae so zaKHm-e-jigar nasur hue

hum jo gae sarmast-e-mohabbat us aubash ke kuche mein

khain khaDi talwaren us ki zaKHmi nashe mein chur hue

koi na hum ko jaane tha hum aise the gumnam aage

yumn-e-ishq se ruswa ho kar shahron mein mashhur hue

kya baatil nachiz ye launDe qadr par apni nazan hain

qudrat-e-haq ke khel to dekho aashiq be-maqdur hue

sar aashiq ka kaT ke un ko sar-ba-gareban rahna tha

so to pagDi pher rakhi hai aur bhi we maghrur hue

zard-o-zabun-o-zar hue hain lutf hai kya is jine ka

murde se bhi barson ke hum hijran mein be-nur hue

pas hi rahna aksar us ke 'mir' sabab tha jine ka

pahunch gae marne ke nazdik us se jo Tuk dur hue