ishq ho haiwan ka ya uns ho insan ka

'ishq ho haivān kā yā uns ho insān kā

laag jī kī jis se ho dushman hai apnī jaan kā

‘āshiq-o-mā’shūq kī maiñ turfa sohbat sair kī

ek jī maare hai marhūn ek hai ehsān kā

maiñ ḳhirad-gum 'ishq meñ us laḌke ke āḳhir huā

ye samar laayā na dekhā chāhnā nādān kā

marnā us ke 'ishq meñ ḳhālī nahīñ hai husn se

rashk ke qābil hai jo kushta hai us maidān kā

gir paḌeñge TuuT kar aksar sitāre charḳh se

hil gayā jo sub.h ko gauhar kisī ke kaan kā

har varaq har safhe meñ ik she’r-e-shor-angez hai

'arsa-e-mehshar hai 'arsa mere bhī dīvān kā

kyā milāve aañkh nargis us kī chashm-e-surḳh se

zard us ġham-dīda ko āzār hai yarqān kā

baat karte jaa.e hai muñh tak muḳhātab ke jhalak

us kā lā’l-e-lab nahīñ muhtāj rang-e-pān kā

kyā kahūñ saarā zamāna kushta-o-murda hai 'mīr'

us ke ik andāz kā ik naaz kā ik aan kā

'ishq ho haiwan ka ya uns ho insan ka

lag ji ki jis se ho dushman hai apni jaan ka

‘ashiq-o-ma’shuq ki main turfa sohbat sair ki

ek ji mare hai marhun ek hai ehsan ka

main KHirad-gum 'ishq mein us laDke ke aaKHir hua

ye samar laya na dekha chahna nadan ka

marna us ke 'ishq mein KHali nahin hai husn se

rashk ke qabil hai jo kushta hai us maidan ka

gir paDenge TuT kar aksar sitare charKH se

hil gaya jo subh ko gauhar kisi ke kan ka

har waraq har safhe mein ek she’r-e-shor-angez hai

'arsa-e-mehshar hai 'arsa mere bhi diwan ka

kya milawe aankh nargis us ki chashm-e-surKH se

zard us gham-dida ko aazar hai yarqan ka

baat karte jae hai munh tak muKHatab ke jhalak

us ka la’l-e-lab nahin muhtaj rang-e-pan ka

kya kahun sara zamana kushta-o-murda hai 'mir'

us ke ek andaz ka ek naz ka ek aan ka