ishq karne ko jigar chahiye aasan nahin

'ishq karne ko jigar chāhiye āsān nahīñ

sab ko dā'vā hai vale ek meñ ye jaan nahīñ

ġhārat-e-dīñ meñ nigah ḳhasmī-e-īmāñ meñ adā

tujh ko kāfir na kahe jo vo musalmān nahīñ

sarsarī miliye butoñ se jo na ho tāb-e-jafā

'ishq kā zā.iqa kuchh dāḳhil-e-īmān nahīñ

ek be-dard tujhe paas nahīñ 'āshiq kā

varna 'ālam meñ kise ḳhātir-e-mehmān nahīñ

kyūñke ġham sar-zada har lahza na aave dil meñ

ghar hai darvesh kā yaañ dar nahīñ darbān nahīñ

ham-nashīñ aah na taklīf-e-shakebā.ī kar

'ishq meñ sabr-o-tahammul ho ye imkān nahīñ

kis tarah manzil-e-maqsūd pe pahuñcheñge 'mīr'

safar-e-dūr hai aur ham kane sāmān nahīñ

'ishq karne ko jigar chahiye aasan nahin

sab ko da'wa hai wale ek mein ye jaan nahin

ghaarat-e-din mein nigah KHasmi-e-iman mein ada

tujh ko kafir na kahe jo wo musalman nahin

sarsari miliye buton se jo na ho tab-e-jafa

'ishq ka zaiqa kuchh daKHil-e-iman nahin

ek be-dard tujhe pas nahin 'ashiq ka

warna 'alam mein kise KHatir-e-mehman nahin

kyunke gham sar-zada har lahza na aawe dil mein

ghar hai darwesh ka yan dar nahin darban nahin

ham-nashin aah na taklif-e-shakebai kar

'ishq mein sabr-o-tahammul ho ye imkan nahin

kis tarah manzil-e-maqsud pe pahunchenge 'mir'

safar-e-dur hai aur hum kane saman nahin