ishq kiya hai us gul ka ya aafat lae sar par hum

ishq kiyā hai us gul kā yā aafat laa.e sar par ham

jhāñkte us ko saath sabā ke sub.h phireñ haiñ ghar ghar ham

roz-o-shab ko apne yā-rab kyūñke kareñge roz-o-shab

haath rakhe rahte haiñ dil par betābi meñ aksar ham

pūchhte raah shikasta-dil kī jā nikle the ka.abe meñ

soch vahāñ to guzrā jī meñ aa.e kidhar se kīdhar ham

shaam se kartā manzil aakar ghar ko hamāre sadr-nashīñ

rakhte sitāra us mah-vash kī chaah meñ gar bad-aḳhtar ham

barsoñ ḳhas-o-ḳhāshāk pe so.e muddat gulḳhan-tābī kī

baḳht na jaage jo us se hoñ ek bhī shab ham-bistar ham

roz batar hai hālat-e-ishqī jaise hoñ bīmār-e-ajal

hai na davā nai koī muālij kyūñkar hoñge behtar ham

us kī janāb se rahmat ho to jī bachtā hai duniyā meñ

is jānib se to baiThe haiñ marnā kar ke muqarrar ham

ab to hamārī taraf se itnā dil ko patthar mat kariyo

saḳhtī se ayyām kī ab tak jiite rahe haiñ mar mar ham

aah ma.īshat roz-o-shab kī saath andoh ke Thahrī hai

rote kuḌhte rahā karte haiñ ġham se hue haiñ ḳhūgar ham

sho.ala ek uThā thā dil se āh-e-ālam-soz kā 'mīr'

Dherī huī hai ḳhākistar kī jaisī shab meñ jal kar ham

ishq kiya hai us gul ka ya aafat lae sar par hum

jhankte us ko sath saba ke subh phiren hain ghar ghar hum

roz-o-shab ko apne ya-rab kyunke karenge roz-o-shab

hath rakhe rahte hain dil par betabi mein aksar hum

puchhte rah shikasta-dil ki ja nikle the kabe mein

soch wahan to guzra ji mein aae kidhar se kidhar hum

sham se karta manzil aakar ghar ko hamare sadr-nashin

rakhte sitara us mah-wash ki chah mein gar bad-aKHtar hum

barson KHas-o-KHashak pe soe muddat gulKHan-tabi ki

baKHt na jage jo us se hon ek bhi shab ham-bistar hum

roz batar hai haalat-e-ishqi jaise hon bimar-e-ajal

hai na dawa nai koi mualij kyunkar honge behtar hum

us ki janab se rahmat ho to ji bachta hai duniya mein

is jaanib se to baiThe hain marna kar ke muqarrar hum

ab to hamari taraf se itna dil ko patthar mat kariyo

saKHti se ayyam ki ab tak jite rahe hain mar mar hum

aah maishat roz-o-shab ki sath andoh ke Thahri hai

rote kuDhte raha karte hain gham se hue hain KHugar hum

shoala ek uTha tha dil se aah-e-alam-soz ka 'mir'

Dheri hui hai KHakistar ki jaisi shab mein jal kar hum