ishq mein ji ko sabr-o-tab kahan

ishq meñ jī ko sabr-o-tāb kahāñ

us se āñkheñ lagīñ to ḳhvāb kahāñ

bekalī dil hī kī tamāshā hai

barq meñ aise iztirāb kahāñ

ḳhat ke aa.e pe kuchh kahe to kahe

abhī maktūb kā javāb kahāñ

hastī apnī hai biich meñ parda

ham na hoveñ to phir hijāb kahāñ

girya-e-shab se surḳh haiñ āñkheñ

mujh balā-nosh ko sharāb kahāñ

ishq hai āshiqoñ ke jalne ko

ye jahannum meñ hai azaab kahāñ

daaġh rahnā dil-o-jigar kā dekh

jalte haiñ is tarah kabāb kahāñ

mahv haiñ us kitābī chehre ke

āshiqoñ ko sar-e-kitāb kahāñ

ishq kā ghar hai 'mīr' se ābād

aise phir ḳhānumāñ-ḳharāb kahāñ

ishq mein ji ko sabr-o-tab kahan

us se aankhen lagin to KHwab kahan

bekali dil hi ki tamasha hai

barq mein aise iztirab kahan

KHat ke aae pe kuchh kahe to kahe

abhi maktub ka jawab kahan

hasti apni hai bich mein parda

hum na howen to phir hijab kahan

girya-e-shab se surKH hain aankhen

mujh bala-nosh ko sharab kahan

ishq hai aashiqon ke jalne ko

ye jahannum mein hai azab kahan

dagh rahna dil-o-jigar ka dekh

jalte hain is tarah kabab kahan

mahw hain us kitabi chehre ke

aashiqon ko sar-e-kitab kahan

ishq ka ghar hai 'mir' se aabaad

aise phir KHanuman-KHarab kahan