jaane mein qatl-gah se tera iKHtiyar hai

jaane meñ qatl-gah se tirā iḳhtiyār hai

par jāneñ jo ga.ī haiñ so rah pur-ġhubār hai

ham aap se ga.e so ilāhī kahāñ ga.e

muddat huī ki apnā hameñ intizār hai

bas vāda-e-visāl se kam de mujhe fareb

aage hī mujh ko terā bahut e.atibār hai

sartābī us se tā.ir-e-qudsī na kar sake

us turk-e-said-band kā vo to shikār hai

maa.il nahīñ hai sarv hī tanhā tirī taraf

gul ko bhī tere dekhne kā ḳhār-ḳhār hai

paivand maiñ zamīñ kā huā us galī meñ lek

yuuñ bhī kahā na un ne ye kis kā mazār hai

kal sarv-e-nāz baaġh meñ aaya nazar mujhe

maiñ ne fareb-e-shauq se jaanā ki yaar hai

ab dekh kar qarār kiyā kar visāl kā

dil ko baġhair tere tanik bhī qarār hai

mat fikr-e-ḳhāna-sāzī meñ mun.im halāk ho

buniyād zindagānī kī nā-pā.edār hai

kab tak sitam kabhū to dilāsā bhī dījiye

bil-farz 'mīr' aisā hī taqsīr-vār hai

jaane mein qatl-gah se tera iKHtiyar hai

par jaanen jo gai hain so rah pur-ghubar hai

hum aap se gae so ilahi kahan gae

muddat hui ki apna hamein intizar hai

bas wada-e-visal se kam de mujhe fareb

aage hi mujh ko tera bahut eatibar hai

sartabi us se tair-e-qudsi na kar sake

us turk-e-said-band ka wo to shikar hai

mail nahin hai sarw hi tanha teri taraf

gul ko bhi tere dekhne ka KHar-KHar hai

paiwand main zamin ka hua us gali mein lek

yun bhi kaha na un ne ye kis ka mazar hai

kal sarw-e-naz bagh mein aaya nazar mujhe

main ne fareb-e-shauq se jaana ki yar hai

ab dekh kar qarar kiya kar visal ka

dil ko baghair tere tanik bhi qarar hai

mat fikr-e-KHana-sazi mein munim halak ho

buniyaad zindagani ki na-paedar hai

kab tak sitam kabhu to dilasa bhi dijiye

bil-farz 'mir' aisa hi taqsir-war hai