jab se chali chaman mein tere rang-e-pan ki baat

jab se chalī chaman meñ tire rang-e-pāñ kī baat

suntā nahīñ hai koī kalī ke dahāñ kī baat

yaañ shahr-e-husn meñ to kahīñ zikr bhī nahīñ

kyā jāniye ki mehr-o-vafā hai kahāñ kī baat

aḳhtar-shanās ko bhī ḳhalal hai dimāġh kā

pūchho agar zamīñ se kahīñ āsmāñ kī baat

aisā ḳhudā hī jaane ki ho arsh yā na ho

dil bolne kī jā nahīñ kyā us makāñ kī baat

kyā lutf jo suno use kahte phirā karo

yuuñ chāhiye ki bhuul vahīñ ho jahāñ kī baat

le shaam se jahāñ meñ hai tā-sub.h ek shor

apnī samajh meñ kuchh bhī nahīñ aatī yaañ kī baat

aubāsh kis ko pūchhte haiñ iltifāt se

sīdhī kabhū sunī nahīñ us bad-zabāñ kī baat

har harf meñ hai ek kajī har suḳhan meñ pech

pinhāñ rahe hai kab kisū kī TeḌhī bāñkī baat

kiine se kuchh kahā hī kiyā zer-e-lab mujhe

kyā pūchhte ho 'mīr' mire mehrbāñ kī baat

jab se chali chaman mein tere rang-e-pan ki baat

sunta nahin hai koi kali ke dahan ki baat

yan shahr-e-husn mein to kahin zikr bhi nahin

kya jaaniye ki mehr-o-wafa hai kahan ki baat

aKHtar-shanas ko bhi KHalal hai dimagh ka

puchho agar zamin se kahin aasman ki baat

aisa KHuda hi jaane ki ho arsh ya na ho

dil bolne ki ja nahin kya us makan ki baat

kya lutf jo suno use kahte phira karo

yun chahiye ki bhul wahin ho jahan ki baat

le sham se jahan mein hai ta-subh ek shor

apni samajh mein kuchh bhi nahin aati yan ki baat

aubash kis ko puchhte hain iltifat se

sidhi kabhu suni nahin us bad-zaban ki baat

har harf mein hai ek kaji har suKHan mein pech

pinhan rahe hai kab kisu ki TeDhi banki baat

kine se kuchh kaha hi kiya zer-e-lab mujhe

kya puchhte ho 'mir' mere mehrban ki baat