jalwa nahin hai nazm mein husn-e-qubul ka

jalva nahīñ hai nazm meñ husn-e-qubūl kā

dīvāñ meñ she'r gar nahīñ nā’t-e-rasūl kā

haq kī talab hai kuchh to mohammad-parast ho

aisā vasīla hai bhī ḳhudā ke husūl kā

matlūb hai zamān-o-makān-o-jahān se

mahbūb hai malak kā falak kā ‘uqūl kā

ahmad ko ham ne jaan rakkhā hai vahī ahad

maz.hab kuchh aur hogā kisī bul-fuzūl kā

jin mardumāñ ko āñkheñ diyāñ haiñ ḳhudā ne ve

surma kareñ haiñ rah kī tirī ḳhaak dhuul kā

maqsūd hai 'alī kā valī kā sabhī kā tū

hai qasd sab ko terī razā ke husūl kā

qaaf

thī guftugū-e-bāġh-e-fadak jaḌ fasād kī

jaane hai jis ko 'ilm hai diiñ ke usuul kā

dā'vā jo haq-shanāsī kā rakhiye so is qadar

phir jān-būjh kariye talaf haq butūl kā

parvā-e-hashr kyā hai tujhe 'mīr' shaad rah

hai 'uzr-ḳhvāh-e-jurm jo vo tujh malūl kā

jalwa nahin hai nazm mein husn-e-qubul ka

diwan mein she'r gar nahin na’t-e-rasul ka

haq ki talab hai kuchh to mohammad-parast ho

aisa wasila hai bhi KHuda ke husul ka

matlub hai zaman-o-makan-o-jahan se

mahbub hai malak ka falak ka ‘uqul ka

ahmad ko hum ne jaan rakkha hai wahi ahad

mazhab kuchh aur hoga kisi bul-fuzul ka

jin marduman ko aankhen diyan hain KHuda ne we

surma karen hain rah ki teri KHak dhul ka

maqsud hai 'ali ka wali ka sabhi ka tu

hai qasd sab ko teri raza ke husul ka

qaf

thi guftugu-e-bagh-e-fadak jaD fasad ki

jaane hai jis ko 'ilm hai din ke usul ka

da'wa jo haq-shanasi ka rakhiye so is qadar

phir jaan-bujh kariye talaf haq butul ka

parwa-e-hashr kya hai tujhe 'mir' shad rah

hai 'uzr-KHwah-e-jurm jo wo tujh malul ka