jigar lohu ko tarse hai main sach kahta hun dil-KHasta

jigar lohū ko tarse hai maiñ sach kahtā huuñ dil-ḳhasta

dalīl is kī numāyāñ hai mirī āñkheñ haiñ ḳhūñ-basta

chaman meñ dil-ḳharāsh āvāz aatī hai chalī shāyad

pas-e-dīvār-e-gulshan nāla-kash hai koī par-basta

jigar sozāñ o dil biryāñ barahna pā o sar qurbāñ

tajāvuz kyā karūñ is se ki un hī kā huuñ vābasta

tire kūche meñ yaksar āshiqoñ ke ḳhār-e-mizhgāñ haiñ

jo tū ghar se kabhū nikle to rakhiyo paañv āhista

mire aage nahīñ hañstā to aa ik sulh kartā huuñ

bhalā maiñ ro.uuñ do dariyā tabassum kar tū yak pasta

ta.ajjub hai mujhe ye sarv ko āzād kahte haiñ

sarāpā dil kī sūrat jis kī ho vo kyā ho vārasta

tirī gul-gasht kī ḳhātir banā hai baaġh dāġhoñ se

par-e-tā.ūs siina hai tamāmī dast guldasta

bajā hai gar falak par faḳhr se pheñke kulāh apnī

kahe jo is zamīñ meñ 'mīr' yak misrā-e-barjasta

jigar lohu ko tarse hai main sach kahta hun dil-KHasta

dalil is ki numayan hai meri aankhen hain KHun-basta

chaman mein dil-KHarash aawaz aati hai chali shayad

pas-e-diwar-e-gulshan nala-kash hai koi par-basta

jigar sozan o dil biryan barahna pa o sar qurban

tajawuz kya karun is se ki un hi ka hun wabasta

tere kuche mein yaksar aashiqon ke KHar-e-mizhgan hain

jo tu ghar se kabhu nikle to rakhiyo panw aahista

mere aage nahin hansta to aa ek sulh karta hun

bhala main roun do dariya tabassum kar tu yak pasta

tajjub hai mujhe ye sarw ko aazad kahte hain

sarapa dil ki surat jis ki ho wo kya ho warasta

teri gul-gasht ki KHatir bana hai bagh daghon se

par-e-taus sina hai tamami dast guldasta

baja hai gar falak par faKHr se phenke kulah apni

kahe jo is zamin mein 'mir' yak misra-e-barjasta