ji rashk se gae jo udhar ko saba chali

jī rashk se ga.e jo udhar ko sabā chalī

kyā kahiye aaj sub.h ajab kuchh havā chalī

kyā rang-o-bū-o-bād-e-sahar sab haiñ garm-e-rāh

kyā hai jo is chaman meñ hai aisī chalā-chalī

tū do qadam jo raah chalā garm ai nigār

mehñdī kafak kī aag diloñ meñ lagā chalī

fitna hai us se shahr meñ barpā hazār jā

talvār us kī chaal pe kyā ek jā chalī

ye jaur-o-jaur-kash the kahāñ aage ishq meñ

tujh se jafā o 'mīr' se rasm-e-vafā chalī

ji rashk se gae jo udhar ko saba chali

kya kahiye aaj subh ajab kuchh hawa chali

kya rang-o-bu-o-baad-e-sahar sab hain garm-e-rah

kya hai jo is chaman mein hai aisi chala-chali

tu do qadam jo rah chala garm ai nigar

mehndi kafak ki aag dilon mein laga chali

fitna hai us se shahr mein barpa hazar ja

talwar us ki chaal pe kya ek ja chali

ye jaur-o-jaur-kash the kahan aage ishq mein

tujh se jafa o 'mir' se rasm-e-wafa chali