jis pe us mauj si shamshir ka ek war kiya

jis pe us mauj sī shamshīr kā ik vaar kiyā

kaam us shauq ke Duube hue kā paar kiyā

aa gayā ishq meñ jo pesh nasheb aur farāz

ho ke maiñ ḳhaak barābar use hamvār kiyā

kyā karūñ jins-e-vafā phere liye jaatā huuñ

baḳht-e-bad ne na use dil kā ḳharīdār kiyā

ittifāq aise paḌe ham to munāfiq Thahre

charḳh-e-nā-sāz ne ġhairoñ se use yaar kiyā

aise āzār uThāne kā hameñ kab thā dimāġh

koft ne dil kī to jiine se bhī bezār kiyā

jī hī jaate sune haiñ ishq ke mash.hūr hue

kyā kiyā ham ne ki is raaz ko iz.hār kiyā

dekhe us maah ko jo kitne mahīne guzre

baḌh ga.ī kāhish-e-dil aisī ki bīmār kiyā

nāla-e-bulbul-e-be-dil hai pareshān bahut

mausam-e-gul ne magar raḳht-e-safar baar kiyā

'mīr' ai kaash zabāñ band rakhā karte ham

sub.h ke bolne ne ham ko giraftār kiyā

jis pe us mauj si shamshir ka ek war kiya

kaam us shauq ke Dube hue ka par kiya

aa gaya ishq mein jo pesh nasheb aur faraaz

ho ke main KHak barabar use hamwar kiya

kya karun jins-e-wafa phere liye jata hun

baKHt-e-bad ne na use dil ka KHaridar kiya

ittifaq aise paDe hum to munafiq Thahre

charKH-e-na-saz ne ghairon se use yar kiya

aise aazar uThane ka hamein kab tha dimagh

koft ne dil ki to jine se bhi bezar kiya

ji hi jate sune hain ishq ke mashhur hue

kya kiya hum ne ki is raaz ko izhaar kiya

dekhe us mah ko jo kitne mahine guzre

baDh gai kahish-e-dil aisi ki bimar kiya

nala-e-bulbul-e-be-dil hai pareshan bahut

mausam-e-gul ne magar raKHt-e-safar bar kiya

'mir' ai kash zaban band rakha karte hum

subh ke bolne ne hum ko giraftar kiya