jo haidari nahin use iman hi nahin
jo haidarī nahīñ use īmān hī nahīñ
ho gar sharīf-e-makka musalmān hī nahīñ
vo turk-e-said-pesha mirā qasd kyā kare
duble-pane se tan meñ mire jaan hī nahīñ
ḳhāl-o-ḳhat aise fitne nigāheñ ye āfateñ
kuchh ik balā vo zulf-e-pareshān hī nahīñ
haiñ juzv-e-ḳhāk ham to ġhubār-e-za.īf se
sar khīñchne kā ham kane sāmān hī nahīñ
dekhī ho jis ne sūrat-e-dilkash vo ek aan
phir sabr us se ho sake imkān hī nahīñ
ḳhurshīd-o-māh-o-gul sabhī ūdhar rahe haiñ dekh
us chehre kā ik aa.ina hairān hī nahīñ
yaksāñ hai tere aage jo dil aur aarsī
kyā ḳhūb-o-zisht kī tujhe pahchān hī nahīñ
sajda us āstāñ kā na jis ke huā nasīb
vo apne e'tiqād meñ insān hī nahīñ
kyā tujh ko bhī junūñ thā ki jaame meñ tere 'mīr'
sab kuchh bajā hai ek garebān hī nahīñ
jo haidari nahin use iman hi nahin
ho gar sharif-e-makka musalman hi nahin
wo turk-e-said-pesha mera qasd kya kare
duble-pane se tan mein mere jaan hi nahin
KHal-o-KHat aise fitne nigahen ye aafaten
kuchh ek bala wo zulf-e-pareshan hi nahin
hain juzw-e-KHak hum to ghubar-e-zaif se
sar khinchne ka hum kane saman hi nahin
dekhi ho jis ne surat-e-dilkash wo ek aan
phir sabr us se ho sake imkan hi nahin
KHurshid-o-mah-o-gul sabhi udhar rahe hain dekh
us chehre ka ek aaina hairan hi nahin
yaksan hai tere aage jo dil aur aarsi
kya KHub-o-zisht ki tujhe pahchan hi nahin
sajda us aastan ka na jis ke hua nasib
wo apne e'tiqad mein insan hi nahin
kya tujh ko bhi junun tha ki jame mein tere 'mir'
sab kuchh baja hai ek gareban hi nahin
- Book : MIRIYAAT - Diwan No- 1, Ghazal No- 0306
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.