junun mein ab ke kaam aai na kuchh tadbir bhi aaKHir

junūñ meñ ab ke kaam aa.ī na kuchh tadbīr bhī āḳhir

ga.ī kal TuuT mere paañv kī zanjīr bhī āḳhir

agar sākit haiñ ham hairat se par haiñ dekhne qābil

ki ik aalam rakhe hai ālam-e-tasvīr bhī āḳhir

yakāyak yuuñ nahīñ hote haiñ pyāre jaan ke laagū

kabhū aadam hī se ho jaatī hai taqsīr bhī āḳhir

kaleja chhan gayā par jān-e-saḳhtī-kash badan meñ hai

hue us shoḳh ke tarkash ke saare tiir bhī āḳhir

na dekhī ek vāshud apne dil kī is gulistāñ meñ

khile paa.e hazāroñ ġhuncha-e-dil-gīr bhī āḳhir

sarokār aah kab tak ḳhāma-o-kāġhaz se yuuñ rakhiye

rakhe hai intihā ahvāl kī tahrīr bhī āḳhir

phire hai bāvlā sā pīchhe un shahrī ġhazāloñ ke

bayābāñ-marg hogā is chalan se 'mīr' bhī āḳhir

junun mein ab ke kaam aai na kuchh tadbir bhi aaKHir

gai kal TuT mere panw ki zanjir bhi aaKHir

agar sakit hain hum hairat se par hain dekhne qabil

ki ek aalam rakhe hai aalam-e-taswir bhi aaKHir

yakayak yun nahin hote hain pyare jaan ke lagu

kabhu aadam hi se ho jati hai taqsir bhi aaKHir

kaleja chhan gaya par jaan-e-saKHti-kash badan mein hai

hue us shoKH ke tarkash ke sare tir bhi aaKHir

na dekhi ek washud apne dil ki is gulistan mein

khile pae hazaron ghuncha-e-dil-gir bhi aaKHir

sarokar aah kab tak KHama-o-kaghaz se yun rakhiye

rakhe hai intiha ahwal ki tahrir bhi aaKHir

phire hai bawla sa pichhe un shahri ghazalon ke

bayaban-marg hoga is chalan se 'mir' bhi aaKHir