jun abr-e-be-kasana rote uThe hain ghar se

juuñ abr-e-be-kasāna rote uThe haiñ ghar se

barse hai ishq apne dīvār aur dar se

jamhūr raah us kī dekhā kare hai aksar

mahfūz rakh ilāhī us ko nazar-guzar se

vahsh aur tair āñkheñ har-sū lagā rahe haiñ

gard-e-rah us kī dekheñ uTh chaltī hai kidhar se

shāyad ki vasl us kā hove to jī bhī Thahre

hotī nahīñ hai ab to taskīn-e-dil ḳhabar se

muddat se chashm-basta baiThā rahā huuñ lekin

vo rū-e-ḳhūb hargiz jaatā nahīñ nazar se

go haath vo na aave dil ġham se ḳhuun karnā

hai laag mere jī ko us shoḳh kī kamar se

ye gul nayā khilā hai le baal to qafas meñ

koī kalī na nikle murġh-e-chaman ke par se

dekho na chashm-e-kam se ye aañkh DabDabā.ī

sairāb abr hote dekhe haiñ chashm-e-tar se

gulshan se le qafas tak āvāz ek sī hai

kyā tā.ir-e-gulistāñ haiñ nāla-kash asar se

har ik ḳharāsh-e-nāḳhun jabhe se sadr tak hai

rijhvāḌ ho to pūchhe koī hameñ hunar se

ye āshiqī hai kaisī aise jiyoge kab tak

tark-e-vafā karo ho marne ke 'mīr' Dar se

jun abr-e-be-kasana rote uThe hain ghar se

barse hai ishq apne diwar aur dar se

jamhur rah us ki dekha kare hai aksar

mahfuz rakh ilahi us ko nazar-guzar se

wahsh aur tair aankhen har-su laga rahe hain

gard-e-rah us ki dekhen uTh chalti hai kidhar se

shayad ki wasl us ka howe to ji bhi Thahre

hoti nahin hai ab to taskin-e-dil KHabar se

muddat se chashm-basta baiTha raha hun lekin

wo ru-e-KHub hargiz jata nahin nazar se

go hath wo na aawe dil gham se KHun karna

hai lag mere ji ko us shoKH ki kamar se

ye gul naya khila hai le baal to qafas mein

koi kali na nikle murgh-e-chaman ke par se

dekho na chashm-e-kam se ye aankh DabDabai

sairab abr hote dekhe hain chashm-e-tar se

gulshan se le qafas tak aawaz ek si hai

kya tair-e-gulistan hain nala-kash asar se

har ek KHarash-e-naKHun jabhe se sadr tak hai

rijhwaD ho to puchhe koi hamein hunar se

ye aashiqi hai kaisi aise jiyoge kab tak

tark-e-wafa karo ho marne ke 'mir' Dar se