kab talak ahwal ye jab koi tera nam le

kab talak ahvāl ye jab koī terā naam le

āshiq-e-behāl donoñ haath se dil thaam le

nā-tavānī se agar mujh meñ nahīñ hai jī to kyā

ishq jo chāhe to murde se bhī apnā kaam le

pahlū-e-āshiq na bistar se lage to hai bajā

dil sī aafat ho baġhal meñ jis ke kyā ārām le

ab dil-e-nālāñ phir us zulf-e-siyah meñ jā chukā

aaj ye bīmār dekheñ kis tarah se shaam le

shāḳh-e-gul terī taraf jhuktī jo hai ai mast-e-nāz

chāhtī hai tū bhī mere haath se ik jaam le

dil kī āsā.ish nahīñ imkān-e-zulf-e-yār meñ

ye shikār-e-muztarib hai dam na zer-e-dām le

izzat ai pīr-e-muġhāñ kuchh hājiyoñ kī hai zarūr

aa.e haiñ tere kane ham jāma-e-ehrām le

kyā balā muftī kā lauñDā sar chaḌhā hai in dinoñ

aave hai goyā ki mujh par qaazī kā e.alām le

ham-nashīñ kah mat butoñ kī 'mīr' ko tasbīh hai

kaam kyā is zikr se un ko ḳhudā kā naam le

kab talak ahwal ye jab koi tera nam le

aashiq-e-behaal donon hath se dil tham le

na-tawani se agar mujh mein nahin hai ji to kya

ishq jo chahe to murde se bhi apna kaam le

pahlu-e-ashiq na bistar se lage to hai baja

dil si aafat ho baghal mein jis ke kya aaram le

ab dil-e-nalan phir us zulf-e-siyah mein ja chuka

aaj ye bimar dekhen kis tarah se sham le

shaKH-e-gul teri taraf jhukti jo hai ai mast-e-naz

chahti hai tu bhi mere hath se ek jam le

dil ki aasaish nahin imkan-e-zulf-e-yar mein

ye shikar-e-muztarib hai dam na zer-e-dam le

izzat ai pir-e-mughan kuchh hajiyon ki hai zarur

aae hain tere kane hum jama-e-ehram le

kya bala mufti ka launDa sar chaDha hai in dinon

aawe hai goya ki mujh par qazi ka ealam le

ham-nashin kah mat buton ki 'mir' ko tasbih hai

kaam kya is zikr se un ko KHuda ka nam le