kabkon ne teri chaal jo dekhi ThiThak gae

kabkoñ ne terī chaal jo dekhī ThiThak ga.e

dil sakinān-e-bāġh ke tujh se aTak ga.e

andoh-e-vasl-o-hijr ne aalam khapā diyā

in do hī manziloñ meñ bahut yaar thak ga.e

mutlaq asar na us ke dil-e-narm meñ kiyā

har chand nāla-hā-e-hazīñ arsh tak ga.e

ifrāt-e-girya se huiiñ ābādiyāñ ḳharāb

sailāb mere ashk ke azhdar bhī bhak ga.e

ve mai-gusār zarf jinheñ ḳhum-kashī ke the

bhar kar nigāh tū ne jo kī vūhīñ chhak ga.e

chand ai sipahr chhātī hamārī jalā kare

ab daaġh khāte khāte kaleje to pak ga.e

ushshāq par jo ve saf-e-mizhgāñ phireñ to 'mīr'

juuñ ashk kitne chū ga.e kitne Tapak ga.e

kabkon ne teri chaal jo dekhi ThiThak gae

dil sakinan-e-bagh ke tujh se aTak gae

andoh-e-wasl-o-hijr ne aalam khapa diya

in do hi manzilon mein bahut yar thak gae

mutlaq asar na us ke dil-e-narm mein kiya

har chand nala-ha-e-hazin arsh tak gae

ifraat-e-girya se huin aabaadiyan KHarab

sailab mere ashk ke azhdar bhi bhak gae

we mai-gusar zarf jinhen KHum-kashi ke the

bhar kar nigah tu ne jo ki wuhin chhak gae

chand ai sipahr chhati hamari jala kare

ab dagh khate khate kaleje to pak gae

ushshaq par jo we saf-e-mizhgan phiren to 'mir'

jun ashk kitne chu gae kitne Tapak gae