kaisi sai-o-kashish koshish se kabe gae but-KHane se

kaisī sa.ī-o-kashish koshish se ka.abe ga.e but-ḳhāne se

us ghar meñ koī bhī na thā sharminda hue ham jaane se

dāman par fānūs ke thā kuchh yūñhī nishāñ ḳhākistar kā

shauq kī maiñ jo nihāyat pūchhī jān-jale parvāne se

nange sāmne aate the to kyā kyā zajr uThāte the

nang lagā hai lagne unheñ ab baat hamārī maane se

pās-e-ġhairat tum ko nahīñ kuchh dariyā par sun ġhair ko tum

ghar se uTh ke chale jaate ho nahāne ke bhī bahāne se

tum ne kahā mar rah bhī jā kar banda jā kar mar hī rahā

kis din maiñ ne uduul kiyā hai sāhib ke farmāne se

suukh ke hoñ lakḌī se kyoñ na zard-o-zubūñ ham āshiq-e-zār

kuchh nahīñ rahtā insāñ meñ har lahza ġham ke khāne se

jab dekho tab turbat-e-āshiq jhakkaḌ se hai tazalzul meñ

ishq hai bād-e-sarsar ko yaañ un kī ḳhaak uḌāne se

barsoñ meñ pahchān huī thī so tum sūrat bhuul ga.e

ye bhī sharārat yaad rahegī ham ko na jaanā jaane se

sunī sunā.ī baat se vaañ kī kab chete haiñ ham ġhāfil

donoñ kaan bhare haiñ apne be-tah yaañ ke fasāne se

'mīr' kī terī kyā suljhegī harf-o-suḳhan meñ gunjlak hai

koī bhī aaqil ulajh paḌe hai nāseh aise divāne se

kaisi sai-o-kashish koshish se kabe gae but-KHane se

us ghar mein koi bhi na tha sharminda hue hum jaane se

daman par fanus ke tha kuchh yunhi nishan KHakistar ka

shauq ki main jo nihayat puchhi jaan-jale parwane se

nange samne aate the to kya kya zajr uThate the

nang laga hai lagne unhen ab baat hamari mane se

pas-e-ghairat tum ko nahin kuchh dariya par sun ghair ko tum

ghar se uTh ke chale jate ho nahane ke bhi bahane se

tum ne kaha mar rah bhi ja kar banda ja kar mar hi raha

kis din main ne udul kiya hai sahib ke farmane se

sukh ke hon lakDi se kyon na zard-o-zubun hum aashiq-e-zar

kuchh nahin rahta insan mein har lahza gham ke khane se

jab dekho tab turbat-e-ashiq jhakkaD se hai tazalzul mein

ishq hai baad-e-sarsar ko yan un ki KHak uDane se

barson mein pahchan hui thi so tum surat bhul gae

ye bhi shararat yaad rahegi hum ko na jaana jaane se

suni sunai baat se wan ki kab chete hain hum ghafil

donon kan bhare hain apne be-tah yan ke fasane se

'mir' ki teri kya suljhegi harf-o-suKHan mein gunjlak hai

koi bhi aaqil ulajh paDe hai naseh aise diwane se