kal le gae the yar hamein bhi chaman ke bich

kal le ga.e the yaar hameñ bhī chaman ke biich

us kī sī bū na aa.ī gul-o-yāsman ke biich

kushta huuñ maiñ to shīrīñ-zabānī-e-yār kā

ai kaash vo zabān ho mere dahan ke biich

is bahr meñ rahā mujhe chakkar bhañvar ke taur

sar-gashtagī meñ umr ga.ī sab vatan ke biich

gar dil jalā bhunā yahī ham saath le ga.e

to aag lag uThegī hamāre kafan ke biich

tangī-e-jāma zulm hai ai bā.is-e-hayāt

paate haiñ lutf jaan kā ham tere tan ke biich

nāzuk bahut hai tū kahīñ afsurdagī na aa.e

chaspānī-e-libās se pyāre badan ke biich

hai qahr vo jo dekhe nazar bhar ke jin ne 'mīr'

barham kiyā jahāñ mizha-barham-zadan ke biich

kal le gae the yar hamein bhi chaman ke bich

us ki si bu na aai gul-o-yasman ke bich

kushta hun main to shirin-zabani-e-yar ka

ai kash wo zaban ho mere dahan ke bich

is bahr mein raha mujhe chakkar bhanwar ke taur

sar-gashtagi mein umr gai sab watan ke bich

gar dil jala bhuna yahi hum sath le gae

to aag lag uThegi hamare kafan ke bich

tangi-e-jama zulm hai ai bais-e-hayat

pate hain lutf jaan ka hum tere tan ke bich

nazuk bahut hai tu kahin afsurdagi na aae

chaspani-e-libas se pyare badan ke bich

hai qahr wo jo dekhe nazar bhar ke jin ne 'mir'

barham kiya jahan mizha-barham-zadan ke bich