kal se dil ki kal bigDi hai ji mara be-kal ho kar

kal se dil kī kal bigḌī hai jī maarā be-kal ho kar

aaj lahū āñkhoñ meñ aaya dard-o-ġham se ro ro kar

ek sujūd ḳhulūs-e-dil se aah kiyā na javānī meñ

sar maare haiñ mehrāboñ meñ yuuñ hī vaqt ko ab kho kar

jeb-darīda ḳhāk-maloñ ke haal se kyā āgāhī tumheñ

raah chalo ho nāz-kunāñ dāman ko lagā kar tum Thokar

ek to ham tū hote nahīñ haiñ sar bahuterā maar chuke

ab behtar hai teġh sitam kī jald lagā kar tū do kar

jī hī malā jaatā hai apnā 'mīr' samāñ ye dekhe se

āñkheñ malte uThte haiñ bistar se dilbar jab so kar

kal se dil ki kal bigDi hai ji mara be-kal ho kar

aaj lahu aankhon mein aaya dard-o-gham se ro ro kar

ek sujud KHulus-e-dil se aah kiya na jawani mein

sar mare hain mehrabon mein yun hi waqt ko ab kho kar

jeb-darida KHak-malon ke haal se kya aagahi tumhein

rah chalo ho naz-kunan daman ko laga kar tum Thokar

ek to hum tu hote nahin hain sar bahutera mar chuke

ab behtar hai tegh sitam ki jald laga kar tu do kar

ji hi mala jata hai apna 'mir' saman ye dekhe se

aankhen malte uThte hain bistar se dilbar jab so kar