kal wa’da-gah mein se jun-tun ke hum ko lae

kal vā’da-gāh meñ se jūñ-tūñ ke ham ko laa.e

hoñToñ pe jaan aa.ī par aah ve na aa.e

zaḳhmoñ pe zaḳhm jhele dāġhoñ pe daaġh khaa.e

yak qatra ḳhūn-e-dil ne kyā kyā sitam uThā.e

us kī taraf ko ham ne jab nāma-bar chalā.e

un kā nishāñ na paayā ḳhat raah meñ se paa.e

ḳhūñ-basta jab talak thiiñ dariyā ruke khaḌe the

aañsū gire karoḌoñ palkoñ ke Tuk hilā.e

us jang-jū ke zaḳhmī achchhe na hote dekhe

gul jab chaman meñ aa.e ve zaḳhm sab dikhā.e

baḌhtīñ nahīñ palak se tā ham talak bhī pahuñcheñ

phirtī haiñ ve nigāheñ palkoñ ke saa.e saa.e

par kī bahār meñ jo mahbūb jalva-gar the

so gardish-e-falak ne sab ḳhaak meñ milā.e

har qit'a-e-chaman par Tuk gaaḌ kar nazar kar

bigḌīñ hazār shakleñ tab phuul ye banā.e

yak harf kī bhī mohlat ham ko na dī ajal ne

thā jī meñ aah kyā kyā par kuchh na kahne paa.e

chhātī sarāh un kī pā.īz meñ jinhoñ ne

ḳhār-o-ḳhas-e-chaman se nāchār dil lagā.e

aage bhī tujh se thā yaañ tasvīr kā sā 'ālam

bedardī-e-falak ne ve naqsh sab miTā.e

muddat huī thī baiThe josh-o-ḳharosh-e-dil ko

Thokar ne us nigah kī āshob phir uThā.e

e’jāz-e-‘ishq hī se jiite rahe vagarna

kyā hausla ki jis meñ āzār ye samā.e

qaaf

dil-garmiyāñ unhoñ kī ġhairoñ se jab na tab thiiñ

majlis meñ jab ga.e ham ġhairat ne jī jalā.e

jiite to 'mīr' har shab is tarz 'umr guzrī

phir gor par hamārī le sham' go ki aa.e

kal wa’da-gah mein se jun-tun ke hum ko lae

honTon pe jaan aai par aah we na aae

zaKHmon pe zaKHm jhele daghon pe dagh khae

yak qatra KHun-e-dil ne kya kya sitam uThae

us ki taraf ko hum ne jab nama-bar chalae

un ka nishan na paya KHat rah mein se pae

KHun-basta jab talak thin dariya ruke khaDe the

aansu gire karoDon palkon ke Tuk hilae

us jang-ju ke zaKHmi achchhe na hote dekhe

gul jab chaman mein aae we zaKHm sab dikhae

baDhtin nahin palak se ta hum talak bhi pahunchen

phirti hain we nigahen palkon ke sae sae

par ki bahaar mein jo mahbub jalwa-gar the

so gardish-e-falak ne sab KHak mein milae

har qit'a-e-chaman par Tuk gaD kar nazar kar

bigDin hazar shaklen tab phul ye banae

yak harf ki bhi mohlat hum ko na di ajal ne

tha ji mein aah kya kya par kuchh na kahne pae

chhati sarah un ki paiz mein jinhon ne

KHar-o-KHas-e-chaman se nachaar dil lagae

aage bhi tujh se tha yan taswir ka sa 'alam

bedardi-e-falak ne we naqsh sab miTae

muddat hui thi baiThe josh-o-KHarosh-e-dil ko

Thokar ne us nigah ki aashob phir uThae

e’jaz-e-‘ishq hi se jite rahe wagarna

kya hausla ki jis mein aazar ye samae

qaf

dil-garmiyan unhon ki ghairon se jab na tab thin

majlis mein jab gae hum ghairat ne ji jalae

jite to 'mir' har shab is tarz 'umr guzri

phir gor par hamari le sham' go ki aae