kar na taKHir tu ek shab ki mulaqat ke bich

kar na tāḳhīr tū ik shab kī mulāqāt ke biich

din na phir jā.eñge ushshāq ke ik raat ke biich

harf-zan mat ho kisī se tū ki ai āfat-e-shahr

jaate rahte haiñ hazāroñ ke sar ik baat ke biich

merī taa.at ko qubūl aah kahāñ tak hogā

sub.ha ik haath meñ hai jaam hai ik haat ke biich

surmagīñ chashm pe us shoḳh kī zinhār na jā

hai siyāhī-e-mizha meñ vo nigah ghaat ke biich

baiTheñ ham us ke sag-e-kū ke barābar kyūñ-kar

karte haiñ aisī ma.īshat to musāvāt ke biich

tāb-o-tāqat ko to ruḳhsat hue muddat guzrī

pand-go yūñhī na kar ab ḳhalal auqāt ke biich

zindagī kis ke bharose pe mohabbat maiñ karūñ

ek dil ġham-zada hai so bhī hai āfāt ke biich

be-mai-o-muġhbacha ik dam na rahā thā ki rahā

ab talak 'mīr' kā takiya hai ḳharābāt ke biich

kar na taKHir tu ek shab ki mulaqat ke bich

din na phir jaenge ushshaq ke ek raat ke bich

harf-zan mat ho kisi se tu ki ai aafat-e-shahr

jate rahte hain hazaron ke sar ek baat ke bich

meri taat ko qubul aah kahan tak hoga

subha ek hath mein hai jam hai ek hat ke bich

surmagin chashm pe us shoKH ki zinhaar na ja

hai siyahi-e-mizha mein wo nigah ghat ke bich

baiThen hum us ke sag-e-ku ke barabar kyun-kar

karte hain aisi maishat to musawat ke bich

tab-o-taqat ko to ruKHsat hue muddat guzri

pand-go yunhi na kar ab KHalal auqat ke bich

zindagi kis ke bharose pe mohabbat main karun

ek dil gham-zada hai so bhi hai aafat ke bich

be-mai-o-mughbacha ek dam na raha tha ki raha

ab talak 'mir' ka takiya hai KHarabaat ke bich