karun jo aah zamin-o-zaman jal jawe

karūñ jo aah zamīn-o-zamān jal jaave

sipahr-e-nīlī kā ye sā.ebān jal jaave

dī aag dil ko mohabbat ne jab se phirtā huuñ

maiñ jis tarah kisū kā ḳhānumān jal jaave

davā-pazīr nahīñ ai tabīb tap ġham kī

badan meñ Tuk rahe to ustuḳhvān jal jaave

na aave soz-e-jigar muñh pe sham.a-sāñ ai kaash

bayān karne se aage zabān jal jaave

hamāre naale bhī ātish hī ke haiñ parkāle

sune to bulbul-e-nālāñ kī jaan jal jaave

hazār-haif ki dil ḳhār-o-ḳhas se bāñdhe koī

ḳhizāñ meñ barq gire āshiyān jal jaave

matā.a-e-sīna sab ātish hai fā.eda kis kā

ḳhayāl ye hai mabādā dukān jal jaave

na pūchh kuchh lab-e-tarsā-bache kī kaifiyyat

kahūñ to duḳhtar-e-raz kī falān jal jaave

na bol 'mīr' se mazlūm-e-ishq hai vo ġharīb

mabādā aah kare sab jahān jal jaave

karun jo aah zamin-o-zaman jal jawe

sipahr-e-nili ka ye saeban jal jawe

di aag dil ko mohabbat ne jab se phirta hun

main jis tarah kisu ka KHanuman jal jawe

dawa-pazir nahin ai tabib tap gham ki

badan mein Tuk rahe to ustuKHwan jal jawe

na aawe soz-e-jigar munh pe shama-san ai kash

bayan karne se aage zaban jal jawe

hamare nale bhi aatish hi ke hain parkale

sune to bulbul-e-nalan ki jaan jal jawe

hazar-haif ki dil KHar-o-KHas se bandhe koi

KHizan mein barq gire aashiyan jal jawe

mataa-e-sina sab aatish hai faeda kis ka

KHayal ye hai mabaada dukan jal jawe

na puchh kuchh lab-e-tarsa-bache ki kaifiyyat

kahun to duKHtar-e-raz ki falan jal jawe

na bol 'mir' se mazlum-e-ishq hai wo gharib

mabaada aah kare sab jahan jal jawe