KHub hai ai abr ek shab aao baham roiye

ḳhuub hai ai abr ik shab aao bāham roiye

par na itnā bhī ki Duube shahr kam-kam roiye

vaqt-e-ḳhush dekhā na ik dam se ziyāda dahr meñ

ḳhanda-e-sub.h-e-chaman par misl-e-shabnam roiye

shādī-o-ġham meñ jahāñ kī ek se das kā hai farq

eid ke din hañsiye to das din moharram roiye

dekhā mātam-ḳhāna-e-ālam ko ham mānind-e-abr

har jagah par jī meñ yuuñ aaya damādam roiye

ho judā firdaus se ya.anī galī se yaar kī

muddatoñ tak kījiye ġham misl-e-ādam roiye

ab se yuuñ kariye muqarrar uThiye jab kohsār se

vādī-e-majnūñ pe bhī ai abr ik dam roiye

ishq meñ taqrīb-e-girya go nahīñ darkār 'mīr'

ek muddat sabr hī kā rakhiye mātam roiye

KHub hai ai abr ek shab aao baham roiye

par na itna bhi ki Dube shahr kam-kam roiye

waqt-e-KHush dekha na ek dam se ziyaada dahr mein

KHanda-e-subh-e-chaman par misl-e-shabnam roiye

shadi-o-gham mein jahan ki ek se das ka hai farq

eid ke din hansiye to das din moharram roiye

dekha matam-KHana-e-alam ko hum manind-e-abr

har jagah par ji mein yun aaya damadam roiye

ho juda firdaus se yani gali se yar ki

muddaton tak kijiye gham misl-e-adam roiye

ab se yun kariye muqarrar uThiye jab kohsar se

wadi-e-majnun pe bhi ai abr ek dam roiye

ishq mein taqrib-e-girya go nahin darkar 'mir'

ek muddat sabr hi ka rakhiye matam roiye