ki sair humne sina-e-yaksar-figar ki

kī sair ham ne sīna-e-yaksar-figār kī

is taḳhte ne bhī ab ke qayāmat bahār kī

dariyā-e-husn-e-yār talātum kare kahīñ

ḳhvāhish hai apne jī meñ bhī bos-o-kanār kī

apnā bhī jī asiir thā āvāz-e-andalīb

dil meñ chubhā kī raat ko juuñ nok-e-ḳhār kī

āñkheñ ġhubār lā.īñ mirī intizār meñ

dekhūñ to gard kab uThe us rahguzār kī

maqdūr tak to zabt karūñ huuñ pe kyā karūñ

muñh se nikal hī jaatī hai ik baat pyaar kī

ab gird-e-sar phirūñ tire huuñ maiñ faqīr-e-mahz

rakhtā thā ek jaan so tujh par nisār kī

kyā said kī taḌap ko uThā.e dimāġh-e-yār

nāzuk bahut hai tab.a mire dil-shikār kī

rakhtā nahīñ tarīq-e-vafā meñ kabhū qadam

ham kuchh na samjhe rāh-o-ravish apne yaar kī

kyā jānūñ chashm-e-tar se udhar dil pe kyā huā

kis ko ḳhabar hai 'mīr' samundar ke paar kī

ki sair hum ne sina-e-yaksar-figar ki

is taKHte ne bhi ab ke qayamat bahaar ki

dariya-e-husn-e-yar talatum kare kahin

KHwahish hai apne ji mein bhi bos-o-kanar ki

apna bhi ji asir tha aawaz-e-andalib

dil mein chubha ki raat ko jun nok-e-KHar ki

aankhen ghubar lain meri intizar mein

dekhun to gard kab uThe us rahguzar ki

maqdur tak to zabt karun hun pe kya karun

munh se nikal hi jati hai ek baat pyar ki

ab gird-e-sar phirun tere hun main faqir-e-mahz

rakhta tha ek jaan so tujh par nisar ki

kya said ki taDap ko uThae dimagh-e-yar

nazuk bahut hai taba mere dil-shikar ki

rakhta nahin tariq-e-wafa mein kabhu qadam

hum kuchh na samjhe rah-o-rawish apne yar ki

kya jaanun chashm-e-tar se udhar dil pe kya hua

kis ko KHabar hai 'mir' samundar ke par ki