koi faqir ye ai kashke dua karta

koī faqīr ye ai kāshke duā kartā

ki mujh ko us kī galī kā ḳhudā gadā kartā

kabhū jo aan ke ham se bhī tū milā kartā

to tere jī meñ muḳhālif na itnī jā kartā

chaman meñ phuul gul ab ke hazār rang khile

dimāġh kaash ki apnā bhī Tuk vafā kartā

faqīr bastī meñ thā to tirā ziyāñ kyā thā

kabhū jo aan nikaltā koī sadā kartā

ilaaj ishq ne aisā kiyā na thā us kā

jo koī aur bhī majnūñ kī kuchh davā kartā

qadam ke chhūne se ustādgī mujhī se huī

kabhū vo yuuñ to mire haath bhī lagā kartā

badī natīja hai nekī kā is zamāne meñ

bhalā kisū se jo kartā to tū burā kartā

talātum aañkh ke sad-rang rahte the tujh bin

kabhū kabhū jo ye dariyā-e-ḳhūñ chaḌhā kartā

kahāñ se niklī ye ātish na māntā thā maiñ

shurūa-e-rabt meñ us ke jo dil jalā kartā

galī se yaar kī ham le ga.e sar-e-pur-shor

vagarna shaam se hangāma hī rahā kartā

ḳharāb mujh ko kiyā dil kī laag ne varna

faqīr takiye se kaahe ko yuuñ uThā kartā

ga.e pe tere na thā ham-nafas koī ai gul

kabhū nasīm se maiñ dard-e-dil kahā kartā

kahīñ kī ḳhaak koī muñh pe kab talak maltā

ḳharāb-o-ḳhvār kahāñ tak bhalā phirā kartā

muī hī rahtī thī izzat mirī mohabbat meñ

halāk aap ko kartā na maiñ to kyā kartā

tire mizāj meñ tāb-e-ta’ab thī 'mīr' kahāñ

kisū se ishq na kartā to tū bhalā kartā

koi faqir ye ai kashke dua karta

ki mujh ko us ki gali ka KHuda gada karta

kabhu jo aan ke hum se bhi tu mila karta

to tere ji mein muKHalif na itni ja karta

chaman mein phul gul ab ke hazar rang khile

dimagh kash ki apna bhi Tuk wafa karta

faqir basti mein tha to tera ziyan kya tha

kabhu jo aan nikalta koi sada karta

ilaj ishq ne aisa kiya na tha us ka

jo koi aur bhi majnun ki kuchh dawa karta

qadam ke chhune se ustadgi mujhi se hui

kabhu wo yun to mere hath bhi laga karta

badi natija hai neki ka is zamane mein

bhala kisu se jo karta to tu bura karta

talatum aankh ke sad-rang rahte the tujh bin

kabhu kabhu jo ye dariya-e-KHun chaDha karta

kahan se nikli ye aatish na manta tha main

shurua-e-rabt mein us ke jo dil jala karta

gali se yar ki hum le gae sar-e-pur-shor

wagarna sham se hangama hi raha karta

KHarab mujh ko kiya dil ki lag ne warna

faqir takiye se kahe ko yun uTha karta

gae pe tere na tha ham-nafas koi ai gul

kabhu nasim se main dard-e-dil kaha karta

kahin ki KHak koi munh pe kab talak malta

KHarab-o-KHwar kahan tak bhala phira karta

mui hi rahti thi izzat meri mohabbat mein

halak aap ko karta na main to kya karta

tere mizaj mein tab-e-ta’ab thi 'mir' kahan

kisu se ishq na karta to tu bhala karta