kya hai ye jo gahe aa jati hai aandhi koi zard

kyā hai ye jo gaahe aa jaatī hai āñdhī koī zard

yā bagūlā jo koī sar khīñche hai sahrā-navard

shauq meñ ye mahmil-e-lailā ke ho kar be-qarār

ik nihād-e-vādī-e-majnūñ se uTh chaltī hai gard

vajh-e-dam-sardī nahīñ maiñ jāntā rone ke baad

miiñh barsā hai kahīñ shāyad havā aatī hai sard

maar rakkhā bātin-e-pīr-e-muġhāñ ne shaiḳh ko

mil gayā us pīr-zan ko ġhaib se ek pīr-mard

ek shab pahlū kiyā thā garm un ne tere saath

raat ko rahtā hai aksar 'mīr' ke pahlū meñ dard

kya hai ye jo gahe aa jati hai aandhi koi zard

ya bagula jo koi sar khinche hai sahra-naward

shauq mein ye mahmil-e-laila ke ho kar be-qarar

ek nihad-e-wadi-e-majnun se uTh chalti hai gard

wajh-e-dam-sardi nahin main jaanta rone ke baad

minh barsa hai kahin shayad hawa aati hai sard

mar rakkha baatin-e-pir-e-mughan ne shaiKH ko

mil gaya us pir-zan ko ghaib se ek pir-mard

ek shab pahlu kiya tha garm un ne tere sath

raat ko rahta hai aksar 'mir' ke pahlu mein dard