kya kaam kiya humne dil yun na lagana tha

kyā kaam kiyā ham ne dil yuuñ na lagānā thā

is jaan kī jokhoñ ko us vaqt na jaanā thā

thā jism kā tark aulā ayyām meñ piirī ke

jaatā thā chalā har dam jaama bhī purānā thā

har aan thī sargoshī yā baat nahīñ gaahe

auqāt hai ik ye bhī ik vo bhī zamāna thā

pāmālī azīzoñ kī rakhnī thī nazar meñ Tuk

itnā bhī tumheñ aa kar yaañ sar na uThānā thā

ik mahv-e-tamāshā haiñ ik garm haiñ qisse ke

yaañ aaj jo kuchh dekhā so kal vo fasāna thā

kyūñkar galī se us kī maiñ uTh ke chalā jaatā

yaañ ḳhaak meñ milnā thā lohū meñ nahānā thā

jo tiir chalā us kā so merī taraf aaya

is ishq ke maidāñ meñ maiñ hī to nishāna thā

jab tū ne nazar pherī tab jaan ga.ī us kī

marnā tire āshiq kā marnā ki bahāna thā

kahtā thā kisū se kuchh taktā thā kisū kā muñh

kal 'mīr' khaḌā thā yaañ sach hai ki divāna thā

kab aur ġhazal kahtā maiñ is zamīñ meñ lekin

parde meñ mujhe apnā ahvāl sunānā thā

kya kaam kiya hum ne dil yun na lagana tha

is jaan ki jokhon ko us waqt na jaana tha

tha jism ka tark aula ayyam mein piri ke

jata tha chala har dam jama bhi purana tha

har aan thi sargoshi ya baat nahin gahe

auqat hai ek ye bhi ek wo bhi zamana tha

pamali azizon ki rakhni thi nazar mein Tuk

itna bhi tumhein aa kar yan sar na uThana tha

ek mahw-e-tamasha hain ek garm hain qisse ke

yan aaj jo kuchh dekha so kal wo fasana tha

kyunkar gali se us ki main uTh ke chala jata

yan KHak mein milna tha lohu mein nahana tha

jo tir chala us ka so meri taraf aaya

is ishq ke maidan mein main hi to nishana tha

jab tu ne nazar pheri tab jaan gai us ki

marna tere aashiq ka marna ki bahana tha

kahta tha kisu se kuchh takta tha kisu ka munh

kal 'mir' khaDa tha yan sach hai ki diwana tha

kab aur ghazal kahta main is zamin mein lekin

parde mein mujhe apna ahwal sunana tha