kya kahe haal kahin dil-zada ja kar apna

kyā kahe haal kahīñ dil-zada jā kar apnā

dil na apnā hai mohabbat meñ na dilbar apnā

dūrī-e-yār meñ hai hāl-e-dil abtar apnā

ham ko sau kos se aatā hai nazar ghar apnā

yak ghaḌī saaf nahīñ ham se huā yaar kabhī

dil bhī juuñ shīsha-e-sā.at hai mukaddar apnā

har taraf ā.ina-dārī meñ hai us ke rū kī

shauq se dekhiye muñh hove hai kīdhar apnā

lab pe lab rakh ke na us gul ke kabhū ham so.e

ye bisāt-e-ḳhasak-o-ḳhār hai bistar apnā

kis tarah harf ho nāseh kā muassir ham meñ

saḳhtiyāñ khīñchte hī dil huā patthar apnā

kaisī rusvā.ī huī ishq meñ kyā naql kareñ

shahr-o-qasbāt meñ mazkūr hai ghar ghar apnā

us gul-e-tar kī qabā ke kahīñ khole the band

rangoñ gul-barg ke nāḳhun hai mo.attar apnā

tujh se be-mehr ke lag lagne na dete hargiz

zor chaltā kuchh agar chaah meñ dil par apnā

pesh kuchh aao yahīñ ham to haiñ har sūrat se

misl-e-ā.īna nahīñ chhoḌte ham ghar apnā

dil bahut khīñchtī hai yaar ke kūche kī zamīñ

lohū us ḳhaak pe girnā hai muqarrar apnā

'mīr' ḳhat bheje par ab rang uḌā jaatā hai

ki kahāñ baiThe kidhar jaave kabūtar apnā

kya kahe haal kahin dil-zada ja kar apna

dil na apna hai mohabbat mein na dilbar apna

duri-e-yar mein hai haal-e-dil abtar apna

hum ko sau kos se aata hai nazar ghar apna

yak ghaDi saf nahin hum se hua yar kabhi

dil bhi jun shisha-e-saat hai mukaddar apna

har taraf aaina-dari mein hai us ke ru ki

shauq se dekhiye munh howe hai kidhar apna

lab pe lab rakh ke na us gul ke kabhu hum soe

ye bisat-e-KHasak-o-KHar hai bistar apna

kis tarah harf ho naseh ka muassir hum mein

saKHtiyan khinchte hi dil hua patthar apna

kaisi ruswai hui ishq mein kya naql karen

shahr-o-qasbaat mein mazkur hai ghar ghar apna

us gul-e-tar ki qaba ke kahin khole the band

rangon gul-barg ke naKHun hai moattar apna

tujh se be-mehr ke lag lagne na dete hargiz

zor chalta kuchh agar chah mein dil par apna

pesh kuchh aao yahin hum to hain har surat se

misl-e-aina nahin chhoDte hum ghar apna

dil bahut khinchti hai yar ke kuche ki zamin

lohu us KHak pe girna hai muqarrar apna

'mir' KHat bheje par ab rang uDa jata hai

ki kahan baiThe kidhar jawe kabutar apna