kya kahiye kali sa wo dahan hai

kyā kahiye kalī sā vo dahan hai

is meñ bhī jo sochiye suḳhan hai

us gul ko lage hai shāḳh-e-gul kab

ye shāḳhcha-bandī-e-chaman hai

vābastagī mujh se shīsha-jāñ kī

us sang se hai ki dil-shikan hai

kyā sahl guzartī hai junūñ se

tohfa ham logoñ kā chalan hai

lutf us ke badan kā kuchh na pūchho

kyā jāniye jaan hai ki tan hai

ve band-e-qabā khule the shāyad

sad-chāk guloñ kā pairahan hai

gah dair meñ haiñ gahe haram meñ

apnā to yahī divāna-pan hai

ham kushta-e-ishq haiñ hamārā

maidān kī ḳhaak hī kafan hai

kar 'mīr' ke haal par tarahhum

vo shahr-ġharīb-o-be-vatan hai

kya kahiye kali sa wo dahan hai

is mein bhi jo sochiye suKHan hai

us gul ko lage hai shaKH-e-gul kab

ye shaKHcha-bandi-e-chaman hai

wabastagi mujh se shisha-jaan ki

us sang se hai ki dil-shikan hai

kya sahl guzarti hai junun se

tohfa hum logon ka chalan hai

lutf us ke badan ka kuchh na puchho

kya jaaniye jaan hai ki tan hai

we band-e-qaba khule the shayad

sad-chaak gulon ka pairahan hai

gah dair mein hain gahe haram mein

apna to yahi diwana-pan hai

hum kushta-e-ishq hain hamara

maidan ki KHak hi kafan hai

kar 'mir' ke haal par tarahhum

wo shahr-gharib-o-be-watan hai