kya kahiye kya rakhen hain hum tujhse yar KHwahish

kyā kahiye kyā rakheñ haiñ ham tujh se yaar ḳhvāhish

yak-jān-o-sad-tamanna yak-dil hazār ḳhvāhish

le haath meñ qafas Tuk sayyād chal chaman tak

muddat se hai hameñ bhī sair-e-bahār ḳhvāhish

nai kuchh gunah hai dil kā nai jurm-e-chashm is meñ

rakhtī hai ham ko itnā be-iḳhtiyār ḳhvāhish

hālāñki umr saarī māyūs guzrī tis par

kyā kyā rakheñ haiñ us ke umīd-vār ḳhvāhish

ġhairat se dostī kī kis kis se hoje dushman

rakhtā hai yaarī hī kī saarā dayār ḳhvāhish

ham mehr-varz kyūñkar ḳhālī hoñ aarzū se

sheva yahī tamanna fann-o-shi.ār ḳhvāhish

uThtī hai mauj har ik āġhosh hī kī sūrat

dariyā ko hai ye kis kā bos-o-kanār ḳhvāhish

sad-rang jalva-gar hai har jaada ġhairat-e-gul

āshiq kī ek paave kyūñkar qarār ḳhvāhish

yak-bār bar na aa.ī us se umiid dil kī

iz.hār karte kab tak yuuñ bār-bār ḳhvāhish

karte haiñ sab tamanna par 'mīr' jī na itnī

rakkhegī maar tum ko pāyān-e-kār ḳhvāhish

kya kahiye kya rakhen hain hum tujh se yar KHwahish

yak-jaan-o-sad-tamanna yak-dil hazar KHwahish

le hath mein qafas Tuk sayyaad chal chaman tak

muddat se hai hamein bhi sair-e-bahaar KHwahish

nai kuchh gunah hai dil ka nai jurm-e-chashm is mein

rakhti hai hum ko itna be-iKHtiyar KHwahish

haalanki umr sari mayus guzri tis par

kya kya rakhen hain us ke umid-war KHwahish

ghairat se dosti ki kis kis se hoje dushman

rakhta hai yari hi ki sara dayar KHwahish

hum mehr-warz kyunkar KHali hon aarzu se

shewa yahi tamanna fann-o-shiar KHwahish

uThti hai mauj har ek aaghosh hi ki surat

dariya ko hai ye kis ka bos-o-kanar KHwahish

sad-rang jalwa-gar hai har jada ghairat-e-gul

aashiq ki ek pawe kyunkar qarar KHwahish

yak-bar bar na aai us se umid dil ki

izhaar karte kab tak yun bar-bar KHwahish

karte hain sab tamanna par 'mir' ji na itni

rakkhegi mar tum ko payan-e-kar KHwahish