kya karen nichi nazar karne se ghussa khae wo

kyā kareñ nīchī nazar karne se ġhussa khaa.e vo

aur majlis meñ jo rahiye dekh to sharmā.e vo

kis tarah taḌpe hai kyā kyā jī ghuTā jaatā hai haa.e

saath us ke dil lagā ho jis kisū kā vaa.e vo

kyā sulūk us bevafā ke naql kariye ham-nashīñ

minnateñ kariye to yaañ tak ghar se chal kar aa.e vo

lutf se labrez hai us kām-e-jāñ kā sab badan

muḳhtalat ho jaa.e ham se jo kabhū to haa.e vo

be-ḳhudī hai jī chalā jaatā hai huuñ sāhab-farāsh

be-ḳhabar ai kaash bālīñ par mirī aa jaa.e vo

ham nahīñ milte vagarna yaar hai tā-qatl saath

lohū pī jaave hamārā ham ko ab jo paa.e vo

'mīr' ko vāshud nahīñ hai maqsad is kā aur hai

ishq se laḌkoñ ke dil ko kab talak bahlā.e vo

kya karen nichi nazar karne se ghussa khae wo

aur majlis mein jo rahiye dekh to sharmae wo

kis tarah taDpe hai kya kya ji ghuTa jata hai hae

sath us ke dil laga ho jis kisu ka wae wo

kya suluk us bewafa ke naql kariye ham-nashin

minnaten kariye to yan tak ghar se chal kar aae wo

lutf se labrez hai us kaam-e-jaan ka sab badan

muKHtalat ho jae hum se jo kabhu to hae wo

be-KHudi hai ji chala jata hai hun sahab-farash

be-KHabar ai kash baalin par meri aa jae wo

hum nahin milte wagarna yar hai ta-qatl sath

lohu pi jawe hamara hum ko ab jo pae wo

'mir' ko washud nahin hai maqsad is ka aur hai

ishq se laDkon ke dil ko kab talak bahlae wo