kya KHana-KHarabi ka hamein KHauf-o-KHatar hai

kyā ḳhāna-ḳharābī kā hameñ ḳhauf-o-ḳhatar hai

ghar hai kisū goshe meñ to makḌī kā sā ghar hai

mailān na ā.īne kā us ko hai na gul kā

kyā jāniye ab rū-e-dil-e-yār kidhar hai

ai sham.a iqāmat-kada is bazm ko mat jaan

raushan hai tire chehre se tū garm-e-safar hai

is āshiq-e-dīvāna kī mat pūchh ma.īshat

dandāñ-ba-jigar dast-ba-dil dāġh-ba-sar hai

kyā aag kī chingāriyāñ siine meñ bharī haiñ

jo aañsū mirī aañkh se girtā hai sharar hai

Dar jaan kā jis jā hai vahīñ ghar bhī hai apnā

ham ḳhāna-ḳharāboñ ko to yaañ ghar hai na dar hai

kyā pursish-e-ahvāl kiyā karte ho aksar

zāhir hai ki bīmār-e-ajal roz batar hai

rahtī haiñ alamnāk hī ve āñkheñ jo achchhī

bad-chashm kisū shaḳhs kī shāyad ki nazar hai

dīdār ke mushtāq haiñ sab jis ke ab us kī

kuchh shorish-e-hangāma-e-mahshar meñ ḳhabar hai

sab chāhte haiñ rushd mirā yuuñ to par ai 'mīr'

shāyad yahī ik aib hai maane ki hunar hai

kya KHana-KHarabi ka hamein KHauf-o-KHatar hai

ghar hai kisu goshe mein to makDi ka sa ghar hai

mailan na aaine ka us ko hai na gul ka

kya jaaniye ab ru-e-dil-e-yar kidhar hai

ai shama iqamat-kada is bazm ko mat jaan

raushan hai tere chehre se tu garm-e-safar hai

is aashiq-e-diwana ki mat puchh maishat

dandan-ba-jigar dast-ba-dil dagh-ba-sar hai

kya aag ki chingariyan sine mein bhari hain

jo aansu meri aankh se girta hai sharar hai

Dar jaan ka jis ja hai wahin ghar bhi hai apna

hum KHana-KHarabon ko to yan ghar hai na dar hai

kya pursish-e-ahwal kiya karte ho aksar

zahir hai ki bimar-e-ajal roz batar hai

rahti hain alamnak hi we aankhen jo achchhi

bad-chashm kisu shaKHs ki shayad ki nazar hai

didar ke mushtaq hain sab jis ke ab us ki

kuchh shorish-e-hangama-e-mahshar mein KHabar hai

sab chahte hain rushd mera yun to par ai 'mir'

shayad yahi ek aib hai mane ki hunar hai